NOMBILANGMO 11 - KITAB NU TUMPU ALLA LELE MA'IMAI'

Tampat anu sinanggohan Tabera

¹ Daagi' kino sansinaan aha bansa Israel nontampu'unimo nososon hi Tumpu kalana nongoa'imo sagala kasusa'an nu aha. Nohongo aha nososonmo aijo' Tumpu pinusamo ka' nompotokamo mae apu hi aha. Apu nolelemo hi aha ka' nompapuimo sambagian na kemah nu aha.

² Mian haha aijo' lewa'mo noloboo' momoita tulung hi Musa. Lantas i Musa binalado'amo hi Tumpu, sahingga natemo na apu aijo'.

³ Kalana apaa na anu jinadimo aijo' sahingga tampat aijo', sinanggohanmo Tabera kalana ikiijo' apu nu Tumpu binanyela-nyelakmo hi aha.

I Musa nompile'imo pitumpulu' na mian anu bau polaya'

⁴ Aha namba na mian nu Israel haha aijo', daagi' ko to mia-mian anu lengkat mae i Salipu'an na nombatuki. Aha aijo' mongkahanda'i hondo mongkaan ponoka', ka' mian nu Israel suele nontampu'unimo nososon. Aha notatae, “Yoh, soba pa' ko ponoha' hi kita!

⁵ Kita tinonginau'mo i ikan anu kinaanto madi' opai oli kiijo' mae i Mesir, kantimun, samaka', prey, babang mea', babang pute'!

⁶ Uuka aiya kita lundengmo madi'mo daagi' ko kaanon, olamo ahi' manna' na anu otoanto.”

⁷ Bau-baunyo nu manna aijo' sumo batu nu bua' nu kau' anu ise' hondo, buhitnyo mopute' ka' momoho' mokini.

^8-9 De pihimo manna aijo' manabu'mo mae hingga-hinggat tiba dondu'ok i tampat pinombauan nu aha kemah. Daagi' subu to mia-mian montolukimo ka' o gilingmo kabai o uja'mo da timbalimo labu, ka' obau kukis anu timpodon ka' madempa'. Nyamitnyo sumo kukis anu o panggang ka' ogalo'i nu lanya' nu zaitun.

¹⁰ I Musa nohongomo aha mian nu Israel lewa'mo nososon, ka' lewa'mo tinuminjo toto santompuk i ahop nu sabatan nu kemah nu aha. Sahingga talalomo hondo pinusa na Tumpu, ka' i Musa sinusa'mo hondo.

¹¹ Lantas ia notataemo hi Tumpu, “Kadaka' Belento nonsusa'imo mae aku sumo aiya? Pa' Belento madi'mo sinanang hi belengku? Kadaka' Belento nombee'imo mae pakalaja'an hi belengku mongatun mian iwi-iwi' aijo'?

¹² Te aku na no hempuakon kabai nohampeakonmo aha aijo'? Kadaka' Belento nompokaumo aku da sumomo samian anu bau potamongi anak ise' ka' saja' montangkung, sahingga aku tionyo ahi' saja' montamongi aha sampetoka sidu-sidutu' mamba i lipu' anu jinanji'mo nu Belento hi mompolee' nu aha.

¹³ Soba toa, aha saja' mati ense momoita ponoha'. Ka' iya mae na tionyo ahi' polioanku ponoha' da obee' hi aha mian iwi-iwi' aijo'?

¹⁴ Madi'mo ku poko ala na mongkalesang anu sumo aijo' na ko mahannyo; talalo maboat hondo na pakalaja'anku.

¹⁵ De Tumpu saja' mombau aku sumo aiya, paya'mo na aku; sahanyo pateimo mae na aku lia-lia' da aku madi'mo mongoa'i kasansala'an anu sumo aiya.”

¹⁶ Lantas Tumpu notataemo hi Musa, “Posihuk, mae na aha bansa Israel pitumpulu' na to tu'a-tu'anyo anu o akui salaku to pola-polaya' nu bansa. Boa mae na aha aiya hi beleng-Ku, i uno nu Kemah-Ku, ka' pokau na aha tuminjo atina' i sohipi' nu beleyum.

¹⁷ Aku mintatau'je mae ka' motatae hi beleyum i tampat atina' ka' sambagian na kuasa anu binee'-Kumo hi beleyum, Ku bee'mo hi aha. Sahingga timbalimo na aha montulungi beleyum mongkalesang hingga-hinggat bansa aiya, ka' bolimo ola posi beleyum na mongkalesang.

¹⁸ Poto'imo uuka aiya hi bansa aijo'. Posusi'mo na butong nu belemiu dodop; belemiu mongkaanmo ponoha'. Tumpu nohongomo belemiu i humang ka' nososon, kalana belemiu ka'oho'mo mongkaan antok nu binatang ka' kantumuu'an nu belemiu lebemo sanang molingkuduimo tempo'nyo i Mesir. Uuka aiya Tumpu mombee'imo belemiu antok nu binatang, ka' okaanmo nu belemiu.

¹⁹ Belemiu mongkaan madi' ola sansinaa kabai uansinaa, kabai liman sinaa, kabai sampulu' na sinaa, ka' madi' ola uampulu' na sinaa,

²⁰ panyo sampe toka sambitu'on na kopinnyo nu belemiu mongkaan sampe belemiu masakit ka' talua-lua'mo kalana kaanon aijo'. Han aijo' jadi kalana belemiu madi'mo nongakui Tumpu anu atina' hi belemiu. Ka' mule' belemiu i humangmo i ahop-Nyo ka' nososonmo kalana belemiu nompala'imo mae lipu' nu Mesir.”

²¹ Lantas i Musa notataemo hi Tumpu, “Bansa anu ku laya' aiya konjoo'nyo 600.000 na mian. Mosia na Belento timbali motatae, au' aijo' Belento timbali mombee'i aha antok nu binatang sampe sukup sambitu'on na kopinnyo?

²² Iya mae na pohumpakan manjoo' na sapi' ka' domba anu tionyo ahi' o kolot da momposanang aha? Pa' iwi-iwi' na ikan i ambai sukup na obee' hi aha?”

²³ Tinaaman nu Tumpu, “Apaa kakuasa'an-Ku ko batasnyo? Beleyum sampaje montoa pa' anu Ku taloakon aijo' totu'u kabai madi'!”

²⁴ Lantas nosabatmo na i Musa ka' pinoto'inyomo hi bansa aijo' apaa na anu pinoto'imo nu Tumpu. I Musa nomposihukmo pitumpulu' na polaya' ka' nompokau aha tinuminjo nontikubi Kemah nu Tumpu.

²⁵ Lantas Tumpu nintatau'mo mae i kundom ka' notataemo hi Musa. Tumpu nongalamo sambagian na kakuasa'an anu binee'-Nyomo hi Musa lantas binee'-Nyomo hi aha pitumpulu' na polaya' aijo'. Salatan Roh nu Tumpu aijo' nintatau'mo hi aha, nontampu'unimo na aha lewa' notatae susumo nabi, panyo madi' pinin.

²⁶ Aha pitumpulu' na polaya' ola i Eldad ka' i Medad, na jinojoong i kemah ka' madi' namba hingga-hinggat tiba sangga'at namba i Kemah nu Tumpu. I uno nu Kemah aijo' Roh nintatau'mo hi aha, ka' ua-ua'aha aijo' nontampu'unimo lewa' notatae susumo nabi.

²⁷ Lantas samian na olitau nosabatmo ka' nopadeka' da mompoto'i hi Musa apaa na anu jinadimo hi Eldad ka' hi Medad.

²⁸ I Yosua anak i Nun, anu nontulungimo i Musa daagi' pe'e ia olitau, notataemo hi Musa, “Poto'i kita Tuuma na aha da bolimo lewa' motatae!”

²⁹ Tinaaman i Musa, “Kadaka' Beleyum mompopikilakonmo aku? La ahi' aku montaha'imani da Tumpu mombee'i Roh-Nyo hi iwi-iwi' bansa-Nyo, ka' mompojadi aha iwi-iwi' timbali nabi!”

³⁰ Lantas i Musa ninsusule'mo i kemah tiba aha pitumpulu' na polaya' nu aha Israel haha aijo'.

Tumpu nompotokamo mae tomonsi' pipido

³¹ Mamanga ahi' Tumpu nompotokamo mae baleba' nolengkat mae i ambai; baleba' aijo' nomboamo mae to tomo-tomonsi' pipido anu lumahap talalo heede' hondo, ola sa'angu' na meten i buan nu tano'. Aha lewa' ko laha-lahab montikubi kemah nu aha aijo' sampe to pia-piangkuka na kilo meten.

³² Sinansinaa ka' sinampahu, ka' sinan-sinaa mule' dodododopnyo, na to mia-mian i lame'mo hondo na lewa' nohakop tomonsi' pipido haha aijo'. Toto samian nohakop kulangnyomo samadala na kilogram. Tomonsi' haha aijo' tinimpa'anmo nu aha titikub kemah da makenseng.

³³ Tempo'nyo daagi' manjoo' na ponoha' kinaan, Tumpu pinusamo hi bansa aijo' ka' pinodaagi'-Nyomo na panyakit anu molele hi aha.

³⁴ Sahingga tampat aijo' sinanggohanmo “Kubulan Mangaluk”, kalana ikiijo'mo na pinongkubulan to mia-mian anu i natemo kalana mangaluk.

³⁵ Lengkat ikiijo' bansa aijo' nolalinmo i lipu' Hazerot, ka' nombaumo kemah i tampat aijo'.