NEHEMIA 8 - KITAB NU TUMPU ALLA LELE MA'IMAI'

I Ezra nombasa'mo Atulan nu Tumpu i ahop nu mian da'isan

¹ I bitu'on anu kinopopitu'nyomo mian nu Israel tinataapmo na jinojoong i kota' nu aha toto samian. I tanggan sa'angu' bitu'onmo ai-aijo' aha iwi-iwi' sinihukmo i Yerusalem, i popasan, i ahop nu Sabatan Daka' Uee. Aha nompoitamo da Kitab Atulan, nu alamae i Imam Ezra, mian anu pande hondo i Atulan anu binee'mo nu Tumpu hi Musa da opake hi aha mian nu Israel.

² Lantas binoamo i Ezra na kitab aijo' i ahop nu mian anu sinilimu'mo, aijo'mo to momo'ane, to boboune ka' to ana-anak anu tu'amo ka' anu sinsumbu'mo.

³ Lantas lengkat pe'e daagi' subu-subu tinoka-toka sonsu'unmo na sinaa, i Ezra nombasa'mo Atulan aijo' i ahop nu aha. Aha iwi-iwi' singkapmo nompotombihing totu-totu'u.

⁴ I Ezra tinuminjo i mimban te kau' na binau anu binaumo da bau katinjoan i Ezra aha mogombu aijo'. Mian anu tinuminjo i sasu koanannyo aitumo aha: i Matica, i Sema, i Anaya, i Uria, i Hilkia, tiba i Maaseya; ka' anu i sasu kowinyo aijo'mo: i Pedaya, i Misael, i Malkia, i Hasum, i Hasbadana, i Zakharia tiba i Mesulam.

⁵ Mimban anu kinatinjoan i Ezra aijo' lebe matangkas nu liu-liu na mian haha aijo', sahingga aha timbali montoa-toa ia. Salatan ia nombuka'mo kitab aijo', nodongan aha lia-lia' suele singkap mo tinuminjo.

⁶ I Ezra notataemo, “O puji' na Tumpu, Tumpu Allah anu talasanggo!” Iwi-iwi' na mian da'isan nohangkatmo tangka-tangkas lima nu aha ka' nontaami, “Totu-totu'u na kinyonyoangku, totu-totu'u na kinyonyoangku!” Lantas aha tinolodadupumo nonsombah Tumpu Allah.

⁷ Lapas aijo' aha po'ule'mo tinuminjo aijo' i kinatinjoan nu aha toto samian, lantas aha mian nu Lewi anu i kiijo' nontutuhakonmo Atulan aijo' hi aha. Mian nu Lewi haha aijo' atina'mo: i Yesua, i Bani, i Serebya, i Yamin, i Akub, i Sabetai, i Hodia, i Maaseya, i Kelita, i Azarya, i Yozabad, i Hanan tiba i Pelaya.

⁸ Aha nompoto'imo alati'nyo nu Atulan nu Tumpu Allah aijo' toto sa'angu' na bahagiannyo ka' nompojelas mule' poso'nyo sahingga mian da'isan nangalati'mo apaa na anu binasa'mo aijo'.

⁹ Nohongo Atulan anu binasa'mo aijo' mian da'isan tinongkolibosonmo, lantas i humangmo sahingga i gubernur Nehemia ka' i Imam Ezra anu pande hondo i Atulan aijo', ka' aha mian nu Lewi haha aijo' anu nontutuhakonmo Atulan aijo', nompoto'imo hi mian da'isan iwi-iwi' sumo uuka na koonyo nu aha, “Sinaa aiya sinaa anu tinantukanmo nu belemiu hi Tumpu Allah, jadi bolimo talalo tongkoliboson ka' humang.

¹⁰ Jadi uuka pinsusule'mo; pongkaan ka' ponginum obau lame-lame' na kinyonyoa. Sambagian na anu o kaan nu belemiu ka' anggur anu o'inum nu belemiu bee' hi aha anu kinadaagi'anmo i anu o kaan, sinaa aiya sinaa anu tinantukanmo hi Tumpu Allah-nto, jadi bolimo susa' na kinyonyoa. Kalame'an nu kinyonyoa anu binee'mo nu Tumpu hi belemiu atina'mo na mompohoson belemiu.”

¹¹ Ka' suele mian nu Lewi haha aijo' nompo uli-ulitmo na mongindeke' mian da'isan, “Bolimo susa' na kinyonyoa i sinaa anu tinantukanmo aiya.”

¹² Sahingga ninsusule'mo iwi-iwi' na mian da'isan da aha mongkaanmo ka' monginumo ka' mombagi-bagimo anu o kaan hi mian sangga'at. Aha i lame'mo kalana nongalati'mo apaa na alatinyo nu anu binasa'mo ka' anu i hongomo nu aha aijo'.

Lamean molame'akon Tahop atopnyo Hon nu kau'

¹³ Dodo-dodopnyo sinihukmo iwi-iwi' na to kapa-kapala nu aha batu-batu sa'anakan mae, to ima-imam ka' to mia-mian aha Lewi lantas nambamo hi Ezra da monggulu'imo pengajalan Atulan nu Tumpu.

¹⁴ Aha nongkabotmo i uno nu Atulan anu binee'mo nu Tumpu hi Musa, Tumpu nonsaimo mian nu Israel jojoong i tahop anu madi' pin na monjoongi, kopinnyo ola tempo'nyo molame'akon lamean Tahop atopnyo Hon nu kau'.

¹⁵ Kalana aitu songko-songko na Yerusalem, i to kota-kota' ka' i kampung toto ise-ise', binebakonmo nu aha na palentah aiya, “Lako'mo mamba i bungkutnyo ka' ala mae na to panga-panga' nu kau' lontio', zaitun, kau' lanya', palma, ka' to kau-kau' sangga'at da bau tahop susumo koonyo nu atulan anu daagi' i uno nu Kitab nu Atulan.”

¹⁶ Lantas nambamo na mian da'isan nongala panga'nyo haha aijo'. Aha iwi-iwi' nombaumo tahop aita' i atop anu mahata i laigan nu aha, i natan nu laigan nu aha, i natan ahop nu Laigan nu Tumpu, i tano' anu ewa koko Sabatan Daka' Uee ka' i tano' anu ewa koko Sabatan Daka Efraim.

¹⁷ Iwi-iwi' na mian da'isan anu ninsusule'mo mae lengkat i Babel pinomboan aha aijo' nombaumo tahop haha aijo' lantas jinojoongmo i kiijo'. Aiyamo na tampu'nannyo nu lamean aijo' binau salatanmo pe'e i Yosua anak i Nun, sahingga iwi-iwi' sinanangmo ka' nohumpakmo kabilahian i kantumuu'an nu aha.

¹⁸ Pinitun sinaa na kopinnyo na aha nolame'akon. Sansina-sinaa bahagian nu kitab Atulan nu Tumpu Allah nubasa'akon i Ezra. Tinoka i sinaa ko ualunnyomo nombaumo adatnyo salaku kamingkotannyomo, susumo anu pinoto'imo nu Atulan nu Tumpu.