NEHEMIA 5 - KITAB NU TUMPU ALLA LELE MA'IMAI'

I Nehemia nontulungimo mian anu kasiasi

¹ Madi' pinin ilapas na aijo' nanjoo'mo na mian nu Yahudi, mau to momo'ane kabai to boboune, lewa'mo notusa' na montoa aha bubu' bansa nu aha.

² Daagi' ko anu notatae, “Anaku manjoo'. Kami palalu hondo i gandum bau pontumuu'.”

³ Daagi' mule' ko anu notatae, “Jadi paya' aku nompogademo ahi' ale' sangga'at, ale' nu anggur ka' laigan mami da bau pongoli gandum da boli silaka nu ohop.”

⁴ Ka' daagi' mule' ko anu notatae, “Nonsabonmo doi bau polunasi hasin anu tinantukanmo i tomundo', aijo'mo hasin nu ale' sosu'anon sangga'at, ka' mule' ale' nu anggur mami.

⁵ Te misa' kami ahi' suele mian nu Yahudi? Te misa' anak mami pokakana ahi' tiba to ana-anak nu Yahudi sangga'at? Maumo sumo aijo' paya' bemanau' kami nompobee'mo ahi' to ana-anak mami binabotuanmo. Ka' mule' daagi'mo ko to ana-anak mami anu toto lalangkoyang pinobalukmo binau botuan. Kami madi'mo moko ala mombau apa-apaa kalana ale' nu sosu'anon mami sangga'at ka' ale' nu anggur pinogademo mami.”

⁶ Nohongo potatae anu notusa'mo sumo aijo', aku notambuha'mo hondo,

⁷ ka' binapikinmo sampa mombau kaputusan. Lantas pinokinde'ankumo na to tu'a-tu'anyo ka' to pola-polaya' nu mian da'isan. Pinoto'ingku, “Belemiu monsakisamo to utu-utus nu belemiu!” Lapas aijo' aku nomposihukmo mian da'isan da mombisalakonmo pa' mosia na mongulus palakala aijo',

⁸ ka' pinoto'ingkumo, “Kita binala'usahamo hondo totu-totu'u nontokongi to utu-utusto mian nu Yahudi anu paya bemanau' nompobalukmo butongnyo hi bansa anu i salipu'an. Panyo uuka aiya belemiumo mule' ahi' na mompakisa aha da mompobaluk butong nu aha hi belemiu, padahan belemiu suele bubu' mian nu Yahudi!” To pola-polaya' haha aijo' madi' noko ala nontaami maumo pe'e ola santaa'.

⁹ Lantas po'ule'mo aku notatae, “Apaa na anu binaumo nu belemiu aijo' madi' ma'ima'! Ola ahi' sabenannyo belemiu tumuu' mabuhuk hi Tumpu Allah. Tiba jalan anu sumo aijo' sampobali'to anu madi' palesaya hi Tumpu aijo' madi' obee'i nu belemiu kasampatan mompopo'ambang kita.

¹⁰ Posi aku, to utu-utusku ka' to sanga-sangalungku momposabolimo doi ka 'gandum hi mian da'isan. Madi'mo po'ule' opoita mami.

¹¹ Belemiu tionyo ahi' suele bolimo mompoita samaya' nu belemiu haha aijo' hi mian da'isan anu binasamay'mo hi belemiu aijo' mau doi kabai gandum, kabai anggur kabai lanya' nu zaitun. Sampa sule'akon na ale' nu sosu'anan sangga'at, ale' nu anggur, ale' nu zaitun ka' laigan nu aha!”

¹² To pola-polaya' nu aha haha aijo' nontaami, “Pokinde' haha itina' otulutimo mami. Osule'akonmo mami iwi-iwi' ka' madi'mo otuntut mami na aha mombayan.” Lantas ilagangkumo na to ima-imam ka' pinalentangkumo na to pola-polaya' haha aijo' da basumpa' i ahop nu to ima-imam haha aijo', da apaa na anu tinaloakonmo nu aha aijo', totu-totu'u tionyo ahi' nubau nu aha.

¹³ Lapas aijo' binukankumo na salempang anu butu-butu' i kompongku lantas kinokabakonkumo ka' pinoto'ingkumo, “Sumo aiya na Tumpu Allah mongkobahakon batu-batu mian anu madi' mongganapi janji'nyo. Mian aijo' timbalimo loloison, laigan ka' iwi-iwi na halata'nyo nu alamo nu Tumpu Allah!” Iwi-iwi' na mian anu binalagombumo nontaami, “Totu-totu'umo na kinyonyoa mami!” Lantas nompuji'mo Tumpu. Jadi to pola-polaya' haha aijo' nongganapimo janji' nu aha.

I Nehemia manonong hondo

¹⁴ Aku tinimbalimo gubernur nu Yehuda sinampulu' ka' ohua' na taun na kinopinnyo, tinampu'unan lengkat pe'e i taun kinouampulu'nyomo sampe tinoka i taun kinotolumpulu'nyomo ka' ohua' na i Tomundo' Artahsasta nompalentah. Tempo'nyo aitu aku tiba to utu-utusku madi' toho' nongala gajingku salaku gubernur.

¹⁵ Iwi-iwi' na gubernur anu nompalentahmo momona ma'isa pe'e aku nompalentah, tinimbalimo tanggungan nu mian da'isan kalana aha montuntut patompulu' na doi salaka, na otalima sansinaa pombayan anu o kaan ka' anggur. Pakalaus mule' to mia-mian anu kopangkat aijo' hi aha suele nonsakisamo mian da'isan. Panyo aku madi' mongka'oho' mombau sumo aijo' kalana aku mabuhuk hi Tumpu Allah.

¹⁶ Iwi-iwi' na kahosonanku binee'kumo hi usaha mombau pagan mesen ka' aku madi' nohumpak tano' mau ola sangkiding salaku balosnyo mae, maumo iwi-iwi' na sangalungku anu lewa'ku pokau i uno nu kapalaluanku suele nokalajamo nombau pagan mesen aijo'.

¹⁷ Sa'atu ka' limampulu' na aha mian nu Yahudi ka' to tu'a-tu'anyo nu aha, biasa lewa' ku laga mongkaan i laiganku, ma'isa olekeng na to mia-mian sangga'at anu mompaha ohani anu suele opokaan.

¹⁸ Sansina-sinaa anu ku posi posadia na ongkos sa'angu' na sapi', anom na domba anu toto lompo-lompo' ka' mule' manuk suele manjoo'. Ka' mule' de sampulu'anmo na kopinnyo ku paka sadiai mule' nu anggur. Maumo sumo aijo' aku madi' mongka'oho' mompoita gajingku salaku anu ko pangkatnyo gubernur, kalana ku sumbu' tanggungan nu mian da'isan talalomo naboat.

¹⁹ Ku kakaase o Tumpu Allah, inau'akon mae na iwi-iwi' na anu binaungkumo hi bansa aiya ka' balakatiakon mae na aku.