NEHEMIA 4 - KITAB NU TUMPU ALLA LELE MA'IMAI'

I Nehemia nontipaha'imo mian nu Yahudi da mongewamo aha sampobali'

¹ Salatan i Sanbalat nohongomo mae taalu' kami mian nu Yehu di nombaumo pagan mesen nu kota', ia pinusamo hondo ka' lewa'mo nompopo'ambang kami.

² I ahop nu to sanga-sangalunyo ka' hi to sulu-suludadu nu Samaria, ia notatae tukoonyo, “Apaa na anu nubaumo nu aha Yahudi aijo', anu madi' koko moko ala mompoposia? Pa' ugaat aha po'ule'mo mombau kota' aijo'? Ugaat koonyo nu aha kalaja aijo' ola sansinaa mingkotmo, asan monsombahkonmo koloban hi Tumpu nu aha? Pa' ugaat koonyo nu aha tambunan nu duhehe anu nopapu aijo' po'ule' mule' opotimbali nu aha batu ka' obau pagan mesen?”

³ Lantas i Tobia anu suele tinjo-tinjo koko hi ia suele notataemo, “Toa na pagan mesen anu binaumo nu aha aijo'! Ola dedeng nu alas timbalimo mohobo'akon!”

⁴ Sahingga aku binalado'amo, “O Tumpu Allah, potombihingakon mae na kami aiya pinopo'ambangmo nu aha! Pokona'kon hi ubak nu aha na anu moko ambang aijo'. Bisa-bisa' iwi-iwi' apaa na halata' nu aha nutomang nu mian ka' aha oboa salaku mian anu i hakop mamba i tano' nu mian anu i salipu'an.

⁵ Boli mongampuni kalakuan nu aha anu ma'idek, ka' boli okolilimi na dosa' nu aha, kalana aha nompopo'ambangmo kami anu hau-haunyomo mombau kota' aiya.”

⁶ Tempo'nyo aitu kami sabole-bolemo nombau pagan mesen aijo', ka' madi' pinin ingko-ingkot na pagan mesen aijo' inintonga'mo na kotangkasnyo na binau, kalana mian da'isan nakekemo hondo na nokalaja.

⁷ Salatan i Sanbalat, i Tobia ka' aha mian nu Amon ka' Asdod tiba to mia-mian nu Arab nohongomo mae taalu' pagan mesen nu Yerusalem binaumo ka' nompaka nalia'mo, ka' mule' pinaha tampolanmo na bolo'nyo aijo' i pagan mesen, aha nompaka potambuha'mo mule'.

⁸ Aha binasangaja'mo montumbuhi Yerusalem da madi'mo mahoson na po'sa'angu'an nu aha Yerusalem.

⁹ Kalana aijo' kami binalado'amo hi Tumpu Allah mami ka' nonjagaimo kota' aijo' mau sinaa mau malom.

¹⁰ Panyo aha mian nu Yehuda nonyanyimo nyanyian aijo'mo, nyanyian montutugi kasusa'an sumo uuka: “Kahosonanto ola mingkot mongato anu oboat, padahan duhehe daagi' manjoo' na tambulannyo. Madi'mo opoko ala okalajanto na mombau pagan mesen nu kota' aiya, desumo aiya.”

¹¹ Hau-haunyo aitu anu monsampobali' kami kahanda'mo montumbuhi kami opotolokengkeng mae nu aha, lantas mompateimo kami sahingga tabantaakmo na nokalaja.

¹² Panyo mian nu Yahudi anu jojoong mompaha ohani tiba aha saja'mo mae tinoka nompoto'i hi kami tanga'an nu sampobali' haha aijo'.

¹³ Kalana aitu pinaha bagi-bagiankumo bajak, talombo' ka' pana' hi mian da'isan, lantas pinokaungkumo nonjaga na aha, batu-batu aha sa'anakan i hiku nu pagan mesen, i tampat anu ma'isa jinadi na binau.

¹⁴ Salatan tinoangku taalu' mian da'isan nabuhukmo ahi', pinoto'ingkumo hi aha ka' hi to tu'a-tu'anyo ka' hi to pola-polaya', “Boli mabuhuk hi sampobali'! Boli okolilimi na Tumpu anu mahoson ka' baani ka' pahampatemo, tinjohakon na to utu-utus nu belemiu, to ana-anak nu belemiu, bengkele' ka' laigan nu belemiu!”

¹⁵ Aha to sampo-sampobali' mami nohongomo mae taalu' tanga'an nu aha ihongomo mami. Sahingga tinolosukapmo na pikilan nu aha tukoonyo nu aha tanga'an nu aha aijo', tinewa'mo nu Tumpu Allah. Lapas aijo' kami po'ule'mo nokalaja nombau pagan mesen aijo'.

¹⁶ Panyo mulai i sinaa aitu, ola sambahagian na mian anu mokalaja, ka' sambahagian mule' balajaga-jaga saja'mo mompusok baju' anu bau pahampate ka' mintoongon talombo', kanta ka' pana'. To pola-polaya' nu mian da'isan totu-totu'u nombee'imo bantuan anu sukup hondo hi mian da'isan,

¹⁷ anu mombau pagan mesen aijo'. Aha anu lewa' mongato posadiaon anu obau pagan mesen aijo' mokalaja nu lima sambiha' kalana lima sambiha' mule' montoongi toongon anu bau pimuhuk.

¹⁸ Aha to tuka-tukang batu, mokalaja montakos bajak. Anu mompuhi tolompet bau tanda de ko bahaya anu toka mae, sabole-bole aitu i sohipi'ku.

¹⁹ Lantas pinoto'ingkumo hi mian da'isan, hi to tu'a-tu'anyo, ka hi aha to pola-polaya', “Kalaja anu obaunto aiya kino ewa-ewanyomo sahingga kita nobagi-bagimo i pagan mesen anu i nantanmo sumo aiya, jadi nompaha pajo-pajo'onimo samian ka' samian.

²⁰ Jadi, de belemiu mohongomo onyi' nu tolompet, sampa lia-lia' mae sihuk hi kami aiya. Tumpu Allah-nto mahampatemo monsangaja'i kita.”

²¹ Sumo aiya na kami mokalaja lengkat pe'e daagi' subu-subu hondo sampe mandala' i langit kantoanmo. Sambahagian na mian da'isan mokalaja mombau pagan mesen sadang sambahagian mule' balajaga-jaga mintoongon talombo'.

²² Tempo'nyo aitu iwi-iwi' na mian anu kopangkat, tiba to posa-posaihon nu aha, pinalentangkumo da male'mo i Yerusalem. Tiba jalan anu sumo aijo' pihi kami timbali monjagai kota' ka' de sinaamo kami mombaumo pagan mesen.

²³ Aku, to sanga-sangalungku, to mia-mian ka anu monjagai aku saja'mo nibaju' nu baju' anu opusok mokalaja, mau sinaa kabai pihi. Kami saja'mo sabole-bole nosadia nontoongi toongon anu bau pahampate.