NEHEMIA 13 - KITAB NU TUMPU ALLA LELE MA'IMAI'

Israel madi'mo naninggalo' tiba mian anu i salipu'an

¹ Salatan Atulan i Musa binasa'akonmo hi mian da'isan, kiijo'je ka' i humpak na katalangannyo sumo uuka: ‘Mian nu Amon ka' Moab madi' hondo timbali maninggalo' tiba mian anu palesayamo hi Tumpu Allah,

² kalana tempo'nyo bansa Israel nompala'imo mae Mesir ohu-ohua' na bansa anu sinahak mami aijo' madi' nombee'i anu o kaan ka' anu o'inum hi bansa aijo'. Pakalaus mule' aha nontamboimo i Bileam da mongkutuki bansa Israel, panyo Tumpu Allah-nto nombali'imo kutuk aijo' tinimbalimo balakat.’

³ Salatan bansa Israel nohongomo aijo', aha nompo'iwi'mo iwi-iwi' na mian anu i salipu'an da madi'mo maninggalo' tiba aha mian Israel.

I Nehemian po'ule'mo nombali'i atulan

⁴ Ma'isa pe'e han aijo' jinadi, daagi' kino minsan i Imam Elyasib, anu binee'anmo kalaja monjaga ka' montoa iwi-iwi' na salipi' pongisian mantu posadiaon i Laigan nu Tumpu, mompahasumbu'mo hondo tiba i Tobia.

⁵ I Elyasib nombee'mo hi Tobia sa'angu' na salipi' anu daka' anu sabenannyo oposadia samata-mata pongisian gandum anu sinombahkonmo hi Tumpu, ka' mule' kamangian, pakakas anu opake i Laigan nu Tumpu, ka' mule' palasombahan mo da obee' hi to ima-imam, anu ingalana sambahagian na gandum, anggur, ka' i sampulu' na lanya' nu zaitun bahagian ka' obee' hi to mia-mian nu Lewi, to mia-mian anu mompahaikakon musik ka' anu monjagai Sabatan Daka' Laigan nu Tumpu.

⁶ Tempo'nyo han aijo' jinadi aku madi' ko anu kiijo' i Yerusalem, kalana i taun kinotolumpulu'nyomo ka' ohua' na i Artahsasta nompalentah, tomundo' nu Babel, aku nambamo i Babel mompoto'i hi tomundo' apa-apaa na anu binaungkumo. Madi' pinin kiijo' mae aku pinobee'je,

⁷ ninsusule' mae aiya i Yerusalem. Pinotokangku i aiya aku tinolokengkengmo kalana nonsumbu'mo taalu' i Elyasib nombee'mo hi Tobia sa'angu' na salipi' i Laigan nu Tumpu.

⁸ Aku notambuha'mo hondo ka' pinaha alinkumo nokiijo' i sambiha'nyo iwi-iwi' na pakakas i Tobia.

⁹ Lapas aijo' pinokaungkumo da mombau adatnyo momposusi' salipi' haha aijo'. Ilapas na aijo' po'ule'mo sinule'akonku nokiijo' iwi-iwi' na gandum anu sinombahkonmo ka' kamangian ka'to paka-pakakas nu Laigan nu Tumpu.

¹⁰ Ka' mule', sinumbu'kumo taalu' to mia-mian anu mompahaikakon musik ka' to mia-mian nu Lewi nompala'imo Yerusalem ka' po'ule'mo ninsusule' i ale' nu aha toto samian, kalana mian da'isan madi' momposukupakon apa-apaa na anu nupalalui nu aha.

¹¹ Jadi pinokinde'ankumo na to tu'a-tu'anyo kalana aha madi'mo mongkalesang Laigan nu Tumpu sahingga madi'mo tinongatun. Lantas po'ule'mo ilagangku na mian nu Lewi ka' to mia-mian anu mahaik musik haha aijo' ka' pinoto'ingkumo da po'ule'mo mule' mombau susumo u'utu mae.

¹² Lapas aijo' songko-songko na mian da'isan nu aha Israel nompo'ule' mule' nombee' anu oba-obagi sampulu' na bahagian ka' sambagian na obee' aijo'mo gandum, anggur ka' lanya' nu zaitun lantas oboamo i salipi' lewa' pompo'una'an mantu posadiaon.

¹³ Aku nombee'imo kalaja mian haha aijo' da montoa batu-batu salipi' pompo'una'an mantu posadiaon haha aijo': i Imam Selemya, i Zadok mian anu pande hondo i Atulan ka' i Pedaya mian nu Lewi. I Hanan anak i Zakur ka' makumpu i Matanya binee'ankumo kalaja da montulungi aha. Ku sumbu' na mian haha aijo' timbali opalesaya ka' timbali mongulus hahan anu obagi-bagi hi to sanga-sangalunyo anu mokalaja hingga-hinggat tiba ia, ka' mule' aha madi' tageo'.

¹⁴ O Tumpu Allah-ngku, inau'akon mae na anu binaungkumo iwi-iwi' anu binaumo kapalaluan i Laigan nu Belento ka' apa-apaa na anu obau i unonnyo.

¹⁵ Tempo'nyo aitu tinoangkumo i sinaa nu Sabat daagi' ko mian nu Yehuda pa' aha sangkuka nompao'mo anggur. Daagi' mule' ko mian sangga'at anu momposake'mo gandum, anggur anu noko pao'mo, bua' nu anggur, bua' nu ara ka' balang sangga'at aijo' i keledai nu aha ka' binoamo nu aha i Yerusalem. Tinewa'kumo na aha mobalu-baluk i Yerusalem.

¹⁶ Pa' aha sangkuka na mian nu Tirus anu jinojoongmo i Yerusalem nomboamo ikan ka' ngangahan anu balang sangga'at anu mamba opobaluk i Yerusalem kinakonamo i sinaa nu Sabat, da opobaluk hi aha mian nu Yahudi.

¹⁷ Pinokinde'ankumo na to pola-polaya' nu Yehuda tukoongku, “Madi' osumbu' nu belemiu na belemiu nombaumo anu ma'idek kalana nohenyuimo sinaa nu Sabat?

¹⁸ Dosa'mo ai-aiya sahingga Tumpu Allah nohukumo mompolee'to ka' nongideimo kota' aiya. Pa' belemiu uuka aiya kahanda'mo mule' mompakatuangi tambuha' nu Tumpu Allah hi Israel sahingga mohenyuimo sinaa nu Sabat?”

¹⁹ Kalana aitu pinalentangkumo de susumo dodopmo na sinaa nu Sabat, uuka sinaa nu Jumat pihinyo, iwi-iwi na Sabatan Daka' nu kota' sampamo opahatumban de malomo, ka' madi'mo timbali otuhea'akon de ma'isa lapas na sinaa nu Sabat, jadi de malomo na sinaa nu Sabat aijo', timbalimo otuhea'akon. Lantas pinojoongkumo na to mia-mian i sabatan daka' haha aijo' montoa ka' montewa' da madi' timbali momposoop i kota' to bala-balang i sinaa nu Sabat.

²⁰ Panyo toto minsan daagi' ko to daga-dagang ka' anu lewa' mompobaluk to bala-balang male'mo i sambiha' nu pagan mesen de pihimo i sinaa nu Jumat.

²¹ Pinoto'ingkumo hi aha, “Palasuma na belemiu montanda'i sampe dodop subu i kiijo'. Ingat, de po'ule' obau nubelemiu atina', ku babaumo na belemiu!” Nolengkat pe'e i sinaa aitu aha madi'mo toho' tinoka i sinaa nu Sabat.

²² Lantas pinokaungkumo na mian nu Lewi haha aijo' mombau adatnyo pomposusi' butong ka' monjagai sabatan daka' haha aijo' montoa ka' montewa' anu toka mae, da mian iwi-iwi' mongadati sinaa nu Sabat. Aku binalado'amo, “O Tumpu Allah, inau'akon mae na aku kalana han aijo', ka' kalibosiakon mae na aku nu kalibosan nu Belento anu talalo hondo daka'.”

²³ Tempo'nyo aijo' tinoangkumo mule' manjoo' na mian nu Yahudi no'osoamo tiba to bou-boune anu lengkat mae i bansa Asdod, Amon ka' Moab.

²⁴ Sambagian na to ana-anak nu aha madi'mo nonsumbu' basa' nu Yahudi, panyo basa' nu Asdod kabai basa' nu mian anu i salipu'an mae.

²⁵ Pinokinde'ankumo na aha ka' kinutukankumo. Daagi' ko anu dinokengkumo ka' kiniiskumo na ubak nu aha. Lapas aijo' pinalentangkumo na aha da basumpa' i sanggo nu Tumpu Allah da aha ka' to ana-anak nu aha madi'mo mo'osoa mogogalo'an tiba bansa sangga'at.

²⁶ Pinoto'ingkumo, “Te misa' dosa' aiya suele binaumo i Tomundo' Salomo? Madi' ko tomundo' anu i dunia aiya na lebe daka' molingkudui ia. Tumpu Allah mongkalibosi hondo ia ka' nompotimbalimo ia tomundo' nu aha songko-songko na Israel. Maumo sumo aijo' ia pagalamo sinale'an nu to bou-boune bansa anu i salipu'an da mombaumo dosa'.

²⁷ Ma'idek hondo na kalakuan anu binaumo nu belemiu! Belemiu baani madi' mompajuli Tumpu Allah, belemiu nongosoaimo to bou-boune anu lengkat mae i bansa salipu'an!”

²⁸ I Yoyada anak i Imam Daka' Elyasib, panyo sala'samian na anak i Yoyada tinimbalimo monian i Sanbalat mian nu kota' Bet-Horon. Kalana aijo' i Yoyada i laa'kumo madi'mo timbali jojoong i Yerusalem.

²⁹ Aku binalado'amo, “O Tumpu Allah-ngku, tutugiakon mae mosia na mian haha aijo' nohenyuimo pangkat imam ka' apa-apaa na anu jinanji'mo nu Belento tiba to ima-imam ka' to mia-mian nu Lewi!”

³⁰ Sumo aitu na aku nompobelesi' bansa Israel i hahan anu madi' toho' obau. Pinokemakonkumo na to atu-atulan hi to ima-imam ka' hi aha mian nu Lewi, sahingga aha toto samian ko posi-posi kalajamo nu aha anu pinotataapmo.

³¹ Ingatunkumo mule' da toka i sinaanyo anu tinantukanmo, kau' anu oposun de monsombahkonmo koloban, oposadiamo, ka' mian da'isan tionyo ahi' momboa mae palasombahan isi nu ale' anu momona ingala i'ale'. Ahennyo aku binalado'amo, “O Tumpu Allah-ngku, inau'akon mae na aiya iwi-iwi' ka' balakatiakon mae na aku.”