NEHEMIA 11 - KITAB NU TUMPU ALLA LELE MA'IMAI'

Mian anu jojoong i Yerusalem

¹ To pola-polaya' jinojoongmo tataap i Yerusalem ka' mule' mian da'isan nompile'imo suele ihe na jojoong i kota' aijo' binuangakon onde na nompile'i, to sampulu' na duan, sa'angu' na auwan na jojong i kota' susi' Yerusalem. Anu madi' kinona nu pompile'i jojoong i to kota-kota' sangga'at.

² Aha aijo' daagi' ko anu sanang na jojoong i kota' Yerusalem ka' aha o puji' nu mian da'isan.

³ I kota-kota' sangga'at, mian da'isan nu Israel, to ima-imam, to mia-mian nu Lewi anu mokalaja i Laigan nu Tumpu, lantas lee' mae nu to posa-posaihon i Salomo jojoong i posi tano' nu aha ka' i to kota-kota' nu aha.

^4-6 Daagi tino pia-piangkuka na tulunan mae i Yehuda ka' i Benyamin jinojoongmo i Yerusalem. Aiya na daputan nu sanggo nu aha: To mia-mian tulunan nu bansa Yehuda; I Ataya anak i Uzia ka' makumpu mae i Zakharia. Daagi' mule' tino pia-piangkuka na mompolee' mae nu aha aijo'mo: i Amarya, i Sefaca ka' i Mahalaleel, i Peres, i Yehuda. Konjoo'nyo nu aha 468 na mian anu toto babaani. I Maasyea anak i Barukh ka' makumpu i Kolhoze. Daagi' mule' tino pia-piangkuka na mompolee' mae nu aha aijo'mo: i Hazaya, i Adaya, i Yoyarib, i Zakharia, i Syela, i Yehuda.

^7-8 To mia-mian tulunan nu bansa Benyamin: I Salu anak i Mesulam ka' makumpu i Yoëd. Daagi' mule' tino pia-piangkuka na mompolee' mae nu aha aijo'mo: i Pedaya, i Koloya, i Ma'aseya, i Itiel tiba i Yesaya. I Gabai tiba i Salai. Aha mato utus madi' mae majo'on tiba i Salu. Iwi-iwi' konjoo'nyo 928 na mian, ka' anu mongkapalai aha,

⁹ i Yo'el anak i Zikhri ka' wakinnyo i Yehuda anak i Hase nu a.

^10-11 To ima-imam: I Yedaya anak i Yoyarib tiba i Yakhin. I Seraya anak i Hilkia ka' makumpu i Mesulam. Daagi' mule' tino pia-piangkuka na mompolee' mae nu aha aijo'mo: i Zadok, i Merayot, i Ahitub, anu montoongi Imam Daka'.

¹² Iwi-iwi' konjoo'nyo aha 822 na imam anu mokalaja i Laigan nu Tumpu. I Adaya anak i Yeroham ka' makumpu i Pelaya. Daagi' mule' tino pia-piangkuka na mompolee' mae nu aha aijo'mo: i Amzi, i Zakharia, i Pasyhur tiba i Malkia.

¹³ To kapa-kapala nu auwan hi aha sa'anakan aijo' konjoo'nyo 242 na mian. I Misai anak i Asareel ka' makumpu i Ahzai. Sala'samian na mompolee'nyo mae sangga'at aijo'mo: i Mesilemot tiba i Imer.

¹⁴ Aha sa'anakan mae aiya 128 na mian, suludadu anu toto babaani. Kapala mae nu aha atina'mo: i Zabdiel, anak i Gedolim.

^15-18 To mia-mian nu aha Lewi: I Semaya anak i Hasub ka' makumpu i Azrikam. Sala'samian na mompolee'nyo mae sangga'at aijo'mo: i Hasabya tiba i Buni. I Sabetai tiba i Yozabad, aha to mia-mian nu Lewi anu talasanggo hondo anu monjagai kalaja i sambiha'nyo nu Laigan nu Tumpu. I Matanya anak i Mikha ka' makumpu i Zabdi, aha lee' mae lee' i Asaf. Ia kapala nu to mia-mian anu manyanyi de balado'amo montalima kase hi Tumpu. I Bakbuya na wakin i Matanyo. I Abda anak i Samua tiba makumpu i Galal, aha lee' mae i Yedutan. Iwi-iwi' konjoo'nyo 284 na mian.

¹⁹ To mia-mian anu monjagai sabatan daka': I Akub, i Talmon tiba to sanga-sangalu nu aha. Iwi-iwi' konjoo'nyo 172 na mian.

²⁰ Mian da'isan nu aha Israel, to ima-imam ka' to mia-mian nu Lewi labinyo, jojoong i posi tano' nu aha anu i kota-kota' i da'erah Yehuda.

²¹ To mia-mian anu mokalaja i Laigan nu Tumpu jojoong i bahagian kota' Yerusalem anu osanggohi Ofel. Aha mokalaja nukapalai i Ziha tiba i Gispa.

²² To mia-mian nu aha Lewi anu montoa mian anu mokalaja, anu jojoong i Yerusalem aijo'mo: i Uzi anak i Bani ka' makumpu i Hasabya. Sala'samian na mompolee'nyo mae sangga'at aijo'mo: i Matanya tiba i Mikha. Ia minsoop aha sa'anakan mae i Asaf anu mokalaja mongulus to panya-panyanyi i Laigan nu Tumpu.

²³ Anu mobolo-bolos na aha sa'anakan mae anu mongulus musik i Laigan nu Tumpu, sansina toka sansinaa otoa i atulan anu tinantukanmo i tomundo'.

²⁴ I Petahya anak i Mesezabeel lengkat mae hi aha sa'anakan i Zera ka' tulunan nu bansa Yehuda, tinimbalimo wakin nu aha bansa Israel i laigan nu tomundo Persia.

Mian anu jojoong i kota-kota' sangga'at

^25-30 Manjoo' na aha to mia-mian da'isan jojoong i kota-kota' anu mompaha ohani tiba ale' nu aha. Pa' aha sangkuka na tulunan mae nu bansa Yehuda jojoong i da'erah olot nu Bersyeba sasu Salatan ka' Bangka'nyo nu Hinom sasu utara. Aha jojoong i kampu-kampung anu toto ise-ise' anu mompaha oha ni aijo'mo: Kiryat-Arba, Dibon, Yekabzeel Yesua, Molada, Bet-Pelet Hazar-Sual, Bersyeba Ziklag, Makhona En-Rimon, Zora, Yarmut Zanoah, Adulam, Azeka, Lakhis.

³¹ Daagi mule' tino pia-piangkuka na tulunan mae nu bansa Benyamin jojoong i Geba, Mikhmas, Ai, Betel ka' kampung toto ise-ise' anu mompaha ohani,

³² i Anatot, Nob, Ananya,

³³ Hazor, Rama, Gitaim,

³⁴ Hadid, Zeboim, Nebalat,

³⁵ Lod, Ono, ka' i Bangka'nyo nu to Tuka-tukang.

³⁶ Daagi' ko gombuan nu aha Lewi pa' aha sangkuka anu momonanyomo na jinojoong i da'erah Yehuda pinoto'imo da jojoong tiba to mia-mian nu aha Benyamin.