NEHEMIA 10 - KITAB NU TUMPU ALLA LELE MA'IMAI'

¹ Mian anu momona nontekengi sulat aijo', aijo'mo i Gubernur Nehemia anak i Hakhalya. Lapas aijo' i Zesekiamo. Ilapas na aha aijo' atina'je ka' mian haha aiya suele nontekengimo:

^2-8 To ima-imam i Seraya, i Azarya, i Yeremia, i Pasyhur, i Amarya, i Malkia, i Hatus, i Sebanya, i Malukh, i Harim, i Meremot, i Obaja, i Daniel, i Gineton, i Barukh, i Mesulam, i Abia, i Miyamin, i Maazya, i Bilgai tiba i Semaya.

^9-13 Aha to mia-mian nu Lewi i Yesua anak i Asanya, i Binui lee' mae nu aha sa'anakan i Henadad, i Kadmiel, i Sebanya, i Hodia, i Kelita, i Pelaya, i Hanan, i Mikha, i Rehob, i Hasabya, i Zakur, i Serebya, i Sebanya, i Hodia, i Bani tiba i Benuni.

^14-27 To pola-polaya' nu bansa i Paros, i Pahat-Moab, i Elam, i Zatu, i Bani, i Buni, i Azgad, i Bebai, i Adonia, i Bigwai, i Adin, i Ater, i Hizkia, i Azur, i Hodia, i Hasum, i Bezai, i Harif, i Anatot, i Nebai, i Magpias, i Mesulam, i Hezir, i Mesezabeel, i Zadok, i Yadua, i Pelaca, i Hanan, i Anaya, i Hosea, i Hananya, i Hasub, i Halohes, i Pilha, i Sobek, i Rehum, i Hasabna, i Ma'aseya, i Ahia, i Hanan, i Anan, i Malukh, i Harim tiba i Ba'ana.

Binauakonmo sulat na Palajanjian

²⁸ Kami mian da'isan nu Israel, to ima-imam, to mia-mian nu Lewi, to mia-mian anu monjagai Sabatan Daka' Laigan nu Tumpu, to mia-mian anu mahaik musik, ka' to mia-mian anu mokalaja i Laigan nu Tumpu, ka' suele to bengke-bengkele' ka' to ana-anak mami anu daka'mo ka' anu sinsumbu'mo ka' mule' iwi-iwi' na anu tulu-tulutan hi atulan nu Tumpu Allah ka' madi'mo maninggalo' hi to mia-mian anu i salipu'an mae anu jinojoongmo i lipu' mami aiya.

²⁹ Kami iwi-iwi' mosa'angu'mo tiba to pola-polaya' mami ka' basumpa'mo da montulutimo atulan nu Tumpu Allah anu binee'-Nyomo hi Musa, posaihonnyo aijo'. O'amalakon mami da Tumpu Allah mongkutuki mae kami de kami madi'mo mombau apaa na anu jinanji'mo mami aiya. Kami basumpa'mo da montulutimo totu-totu'u palentah iwi-iwi'; atulan ka' apaa na anu ingatunmo nu Tumpu, Tumpu Allah mami.

³⁰ Kami basumpa'mo da madi'mo mogogalo'an na mo'osoa tiba to bansa-bansa sangga'at anu jinojoongmo i lipu' mami aiya.

³¹ De daagi' ko bansa anu i salipu'an mae mompobaluk gandum kabai pa' balang apaa hi kami i sinaa nu Sabat kabai pa' i sinaa anu susi' sangga'at kami madi'mo mongoli. De tokamo na taun anu kopopitu'nyomo kami madi'mo mongale kabai mompoita samaya' mami hi mian.

³² Sataun toka sataun kami toto samian tionyo ahi' mombee' olima' na gram na salaka anu bau pongongkosi Laigan nu Tumpu.

³³ Kami tionyo ahi' momposadia apa-apaa na anu opalalui de monsombahmo Tumpu kiijo' i Laigan nu Tumpu, aijo'mo: roti anu nasasakmo, palasombahan gandum sansinaa-toka sansinaa, binatang koloban anu opotunu sansinaa toka sansinaa, palasombahan anu susi' sangga'at, koloban anu bau pongampuni dosa' aha mian nu Israel, ka' sinin na anu opalalui opake i Laigan nu Tumpu.

³⁴ Kami mian da'isan to ima-imam ka' mule' aha to mia-mian nu Lewi nombuangmo onde sataun toka sataun da osumbu' pa aha sa'anakan mae ihe na montoukai kau' anu oposun bau pompotunuan koloban palasombahan hi Tumpu Allah mami susumo koonyo nu Atulan nu Tumpu.

³⁵ Sataun toka sataun kami momboa i Laigan nu Tumpu bua' nu gandum anu momona ka' bua' nu kau' iwi-iwi' anu momona maha i kau' anu sinu'anmo mami.

³⁶ Kami tionyo ahi' momboa to ana-anak mami anu to momo ane tumpenyo hi to ima-imam i Laigan nu Tumpu da obee' hi Tumpu Allah susumo koonyo nu Atulan nu Tumpu. Kami suele mombee' anak nu sapi', anak nu domba kabai anak nu mee' mami anu momona o anakakon.

³⁷ Kami tionyo ahi' momboa hi to ima-imam i Laigan nu Tumpu kompolan nu gandum anu binaumo labu aijo'mo bua' nu gandum anu momona opadak na bua'nyo sataun toka sataun ka' mule' iwi-iwi' na palasombahan sangga'at sumo anggur, lanya' nu zaitun ka'iwi-iwi' na ngangahan nu bua' nu kau' sangga'at. Palasombahan anu sambagian na o ala i sampulu' na bagian na isi nu ale' tionyo ahi' oboa mami hi to mia-mian nu Lewi anu molimu' apa-apaa na palasombahan anu o ala sambagian hi sampulu' na bagian anu lengkat mae i songko-songko na kota' anu ko ale'nyo.

³⁸ Panyo samian na imam lee' mae i Harun tionyo ahi' monsangalui mian nu Lewi haha aijo' de aha molimu'mo palasombahan haha aijo'. Ka' mule' iwi-iwi' na palasombahan haha aijo' obagi sampulu' na bagian lantas sambagian oboamo ka' oposopmo nu aha mian nu Lewi haha aijo' i salipi' anu lewa' pompo'una'an mantu posadiaon kiijo' i Laigan nu Tumpu.

³⁹ Mian da'isan nu aha Israel tiba to mia-mian nu aha Lewi tionyo ahi' momboa anu nu bee'mo mae nu mian, anu saja nu bee' mae nu mian aijo'mo: gandum, anggur, ka' mule' lanya' nu zaitun oboa i salipi' pompo'una'an mantu ka' suele pompo'una'an pakakas nu Laigan nu Tumpu. Ikiijo'mo suele na kajojoongan nu to ima-imam anu mohumpakmo gililan mokalaja sinaa aitu, to mia-mian anu monjaga sabatan Daka' Laigan nu Tumpu ka' mule' to mia-mian anu lewa manyanyi i Laigan nu Tumpu. Kami madi' lenta na mongkalesang Laigan nu Tumpu mami.