MOHAANGI 3 - KITAB NU TUMPU ALLA LELE MA'IMAI'

Hukuman, balatobat, anu otaha'imani

¹ Akumo na mian anu nongoa'imo kasansala'an, kalana nohumpakmo kapusan nu Tumpu Allah.

² Nompaka pajo'onmo na aku i hela'-Nyo namba i tampat anu pikat hondomi'.

³ Pino'uli-ulit-Nyo na aku binobotan-Nyo, sinansinaa madi' kino kalibosan-Nyo.

⁴ Binau-Nyo na butongku da binelaon anu tinadokmo hondo ka' sinin na bukungku i nopato'mo.

⁵ Sinabutan-Nyomo mae na aku nu kapatean ka' kasansala'an.

⁶ Pinakisa-Nyomo na aku jojoong i uno nu pikat susumo mian anu sinilakamo tempo'nyo naipuan mae.

⁷ Tiba pompungu anu madodo pinungu-Nyomo na aku, sahingga madi'mo ko jalan sangga'at na aku.

⁸ Aku nolokihismo momoita tulung, panyo Tumpu Allah madi'mo nohongo.

⁹ Ia monggolo-golotakon jalanku tiba to paga-pagan batu.

¹⁰ Susumo beruang Ia nontanda'imo susumo singa ia nolabotimo aku.

¹¹ Iloloi'-Nyo na aku sampe nosele nompala'i jalan, lantas aku binahe-bahe'nyo ka' pinala'iannyomo.

¹² Ia nompotajumo pompelet-Nyo ka' pinopatu-Nyomo mae hi belengku na hihisnyo.

¹³ Hihisnyo nolampasanmo butongku sampe nonsusuk sulengku.

¹⁴ Sansina-sinaa na aku kinokojoan nu iwi-iwi' mian ka' ponojadimo nu aha anu lewa' osisik.

¹⁵ Ola ahi' ka'idekan na binee'-Nyo mae hi belengku salaku anu okaan ka' anu o'inum.

¹⁶ Ohupku dinumolakon-Nyomo itano' bese'ku dinosikakon-Nyomo ibatu sampe nopato'.

¹⁷ Pininmo na aku madi' mongoa'i ka'ima'an; madi'mo sinumbu'ku pa' mosia na mongoa'i kabilahian.

¹⁸ Aku madi'mo daagi' tinalasanggo madi'mo daagi' ko anu otaha'imani hi Tumpu.

¹⁹ Mompopikilakon memo mahalajangan ka' kasusa'anku sumomo mongkaan lasung anu mapakat.

²⁰ Saja'mo ku popikilakon na han aijo', sahingga kinyonyoangku madi'mo sinanang.

²¹ Maumo sumo aijo' po'ule'mo ahi' kutaha' imani salatan aku nonginau'mo han aiya;

²² Liibos nu Tumpu madi' toho' mingkot, balakatnyo madi' toho' mingkot,

²³ saja' bu'ou de subu-subumo totu'u, Tumpu manonong hondo!

²⁴ Tumpu aijo'mo na halatangku. Kalana aijo', aku taha iman hondo hi ia.

Anu nutaha'imani nu Israel

²⁵ Tumpu sanang hi mian anu montaha'imani ia, ka' hi mian anu molio ia.

²⁶ Jadi, sahanyo ahi' otanda'into ima-ima' sampe Tumpu tokamo mae montulungi;

²⁷ sahanyo kita balajan sabaan tempo'nyo daagi' olitau.

²⁸ Tempo'nyo Tumpu mombee'i kasansala'an, tionyo ahi' kita sumuhang hoko-hokot, ola sausa'.

²⁹ Sahanyo kita mompoduku butong ka' boli mombau apa-apaa. Kalana ugaat daagi' ko anu otaha'imani.

³⁰ Maumo ohapa' ka' lewa' opobau-bau, iwi-iwi' aijo' otalimanto mo ahi'.

³¹ Kalana, Tumpu madi' kokoan madi'mo montalima kita sampe toka sidu-sidutu'.

³² Salatan ia nombee'imo mae kasansala'an ia mule' nolibosmo ahi', kalana ia tataap mongkalibosi kita tiba liibos anu madi' ko kahimpusannyo.

³³ Ia madi' sanang na kinyonyoa mompojohok kita sansala ka' mongoa'i kasusa'an.

³⁴ De butongto madi'mo sanang i uno nu talungku',

³⁵ de madi'mo ko hak anu binee'mo nu Tumpu,

³⁶ kalana ka'adilan gineo-geo'akonmo ka' nu palahatikan tantu nu sumbu' nu Tumpu.

³⁷ De Tumpu madi' mongkahanda'i pa' apa-apaa tantu manusia madi' moko ala mombau apa-apaa mongkona han aijo'.

³⁸ Ka'ima'an ka' ka'idekan opojalan ola kalana palentah nu Tumpu.

³⁹ Kadaka' mian motusa'mo ka' mompele-pele' de ia ohukum kalana dosa-dosa'nyo?

^40-41 Sahanyo oselidikinto na kantumuu'anto, ka' pobalikmo hi Tumpu Allah i suluga'. Imbo'mo da kita momposadia kinyonyoa ka' balado'a

⁴² “Kami binaladosa'mo ka' notomuhukmo hi Belento, O Tumpu, ka' Belento madi'mo nongampuni mae.

⁴³ Kami i loloi' nu Belento ka' pinateanmo nu Belento, kalibosan nu belento sulu-suluk i uno nu kapusan nu Belento.

⁴⁴ Kapusan nu Belento sumomo kundom anu butolu hondo sahingga dosa-dosa' mami madi' noko pinsoop.

⁴⁵ Kami pinojadimo nu Belento susumo duhehe i mata songko-songko na dunia.

⁴⁶ Kami ingalumo nu sampobali' mami ka' kinokojoan;

⁴⁷ kami tinuda'an nu kasansala'an ka' kahansunan, ka' tinumuu'mo i uno nu balaa' ka' kabuhukan.

⁴⁸ Lolu'ku no'ilimo susumo kaunyo kalana bansangku i hansunmo.

⁴⁹ Aku i humangmo madi'mo kinokabelentiannyo,

⁵⁰ sampe Belento, O Tumpu i suluga', mompalahatikan mae kami.

⁵¹ Kinyonyoangku tinimbalimo sinusa' montoa nasib nu to bou-boune i kota' mami.

⁵² Sumomo tomonsi', na aku iloloi' nu sampobali' anu madi' ko saba-sababnyo mongka'idekimo aku.

⁵³ I uno nu bubung anu madi'mo ko ueenyo na aha nongalin aku, titu-tituu' lantas nontabuhimo aku nu batu.

⁵⁴ Uee nosawe'mo tinoka-toka i ubak-ku, ka' aku binapikinmo, – ‘Ningkotmo na tinuu'ku!’

⁵⁵ O Tumpu, aku momoitamo tulung hi Belento, lengkat i lananyo nu bubung anu maleeng aijo'.

^56-57 Ku poita hondo-hondo da bolimo mompiiti bihing nu Belento mongkona anu kupoita da Belento montulungi mae aku. Sahingga do'angku ihongomo nu Belento, ka' Belento tinokamo mae nati ohani; Belento notatae, ‘Boli mabuhuk.’

⁵⁸ Belento toka mae nongala-alapakonmo palakalangku, o Tumpu, butongku pinosalamatmo nu Belento.

^59-60 Belento nontoamo palabuatan ma'idek anu binaumo hi belengku, tanga'an ma'idek nu sampobali anu mongka'ideki mae aku. Kalana aijo', o Tumpu, tinjohiakon mae na palakalangku,

⁶¹ Belento, Tumpu, nohongomo aku ingalu; osumbu' nu Belento iwi-iwi' na tanga'an nu aha.

⁶² Aha monsibalakon aku, sansina-sinaa. De monsilakaimo aku, aha mombaumo tanga'an anu ma'idek.

⁶³ Lengkat pe'e subu sampe pihi, binaumo nu aha na aku anu lewa' okokojoi.

⁶⁴ Hukumo na aha sitimbang tiba kalakuan nu aha, o Tumpu.

⁶⁵ Kutukimo na aha, ka' pojohokmo na aha jojoong i uno nu kasusa'an anu madi'mo ko anu otaha imani.

⁶⁶ Loloi'mo ka' hansunimo na aha iwi-iwi' sampe aha mingkotmo iwi-iwi' i dunia aiya.”