MIKHA 4 - KITAB NU TUMPU ALLA LELE MA'IMAI'

Dunia damemo de Tumpumo na mompalentah

¹ I sinaa anu aiya mae o ahopi puge'nyo pipinombauan Laigan nu Tumpu tuminjomo hodi-hodi' ka' matangkas hondo lebemo moliu-liu to bungku-bungkutnyo ka' to puge-puge'nyo. Iwi-iwi' na bansa mododuyutanmo mambamo mompanjolongi

² aha iwi-iwi' motataemo, “Imbo' da kita mamba mindako mokiita' i puge'nyo nu Tumpu i Laigan nu Tumpu Israel! Ia nompogulu'mo hi kita apaa na anu tionyo ahi' obaunto. Kita mombatukimo pangajalan-Nyo kalana pangajalan nu Tumpu lengkat mae i Yerusalem; kiita mae i Sion Ia notataemo hi mian-Nyo anu palesayamo.”

³ Tumpu momputusimo palakala hi aha to bansa-bansa hi aha to nega-negara anu mahoson anu majo'on kabai anu ohani. To baja-bajak nu aha otutukmo bau pajeko ka' mule' to talo-talombo' nu aha opotimbalimo piso' bau pongkiis. To bansa-bansa madi'mo daagi' paintumbu-tumbuhian ka' mule' madi'mo daagi' mosadia da mahampatemo.

⁴ Iwi-iwi na mian tumuu' madi'mo ko anu mompoposia ka' mohumpakmo kantumuu'an ma'ima' itotonga' nu ale' nu anggur tiba ale' nu ara; madi'mo ko anu lewa' monggala-gala ia aijo'mo na palajanjian nu Tumpu Anu Daka' na Kuasanyo.

⁵ Iwi-iwi na bansa i dunia aiya monsombahmo ka' tulu-tulutanmo hi posi pilogot nu aha. Panyo kita na montuluti ahi' Tumpunto ka' monsombah Ia sampe toka sidu-sidutu'.

Israel minsusule'mo mae lengkat i tampat pinomboan ka' pinompojoongan aha

⁶ Tumpu notatae, “Tokaje mae na tempo'nyo Ku posihukmo na to mia-mian anu Kuhukumo, aitumo aha anu binee'anmo kasansala'an i tampat pinomboan ka' pinompojoongan aha.

⁷ Aha ilepo'anmo ka' najo'onmo i kampung nu aha. Panyo kona hi aha mian anu tinontuha' aijo' Ku tampu'unimo na mompojadi sa'angu' na tulunan mule'. Aha saidi' mae timbalimo sa' angu' na bansa anu daka' ka' mahoson. Ku palentahje na aha lengkat mae aita'i Sion sampe toka sidu-sidutu'.”

⁸ Ka' beleyum Yerusalem tampat nu Tumpu monjagai mian-Nyo anu palesayamo susumo polaya' anu monjagai tompukan nu dombanyo, beleyum po ule'mo timbali puso nu kota' nu kalaja'an nu belemiu susumo u'utu mae momona.

⁹ Kadaka' humangmo na beleyum hoso-hoson? Kadaka' beleyum nongoa'imo kasansala'an susumo boune anu kahanda'mo monganak? Pa' ugaat kalana beleyum madi' ko tomundo'nyo ka' mule' anu lewa' mompokinde'i beleyum sinilakamo?

¹⁰ O, mian anu jojoong i Yerusalem, uminyohatmo ka' tolo odosmo susumo boune anu kahanda'mo mongaanak! Kalana uuka aiya belemiu tionyo ahi' mompala'imo kota' ka' jojoongmo i padang. Belemiu memang ahi' mambamo i Babel, panyo ikiijo' mae Tumpu molapasakonmo belemiu da madi'mo nu pahampateakon nu mian anu monsampobali' belemiu.

¹¹ Manjoo' na bansa anu nosa'angu'mo kahanda'mo mompahampateakon belemiu o, Yerusalem! Aha notatae, “Yerusalem tionyo ahi' ohansunimo! Tionyo ahi' otoa mami na kota' aijo' hansun!”

¹² Panyo bansa haha aijo' madi' monsumbu' pa' mosia na tanga'an nu Tumpu. Madi' nu sumbu' nu aha, na aha aijo' pinosihuk-Nyomo saba' da ohukumo susumo gandum otambunmo da o, ututmo.

¹³ Tumpu notatae, “O, mian anu jojoong i Yerusalem lako'mo ka' pahampeja' akonmo na to sampo-sampobali' nu belemiu! Ku pojadije na belemiu da mahoson susumo sapi' anu nintandukmo besak ka' ningkonukumo tambaga. Belemiu mohansunije manjoo' hondo na bansang ka' mule' kakaya'an anu i humpak nu aha kalana lewa' nompahuhuakon, osombahkonmo mae hi beleng-Ku, Tumpu nu songko-songko na dunia.”

¹⁴ O, mian anu jojoong i Yerusalem sabole-bole ahi' pongkakase da nu tulungi mae nu Tumpu na belemiu! Kita tinikumo mae nu sampobali'! Sampobali' nontumbuhimo to pola-polaya' nu aha Israel!