MIKHA 3 - KITAB NU TUMPU ALLA LELE MA'IMAI'

I Mikha nombatamo to pola-polaya' nu Israel

¹ Potombihing mae o belemiu anu singkap balakuasa i Israel! Sabenanyo tionyo ahi' osumbu' nu belemiu apaa na anu osanggohi adin,

² panyo belemiu ola mule' ahi' mongka'ideki palabuatan anu ma'ima' ka' mongka'ima'i palabuatan anu ma'idek. Kinilitanmo nu belemiu titu-tituu' na bansangku, ka' mule' belemiu nombentekimo antok nu aha anu aijo' i buku nu aha.

³ Bansangku kinaanmo nu belemiu. Kilit nu aha binea-beakmo nu belemiu ka' mule' bukunyo i hansunanmo nu belemiu. Aha pinado-padotmo nu belemiu susumo mompado-padot antok nu binatang anu o'isimo i kuhon.

⁴ Tokaje mae na tempo'nyo belemiu moloboo'mo momoita tulung hi Tumpu, panyo Ia madi' ahi' montaami. Ia madi' montalima do'a nu belemiu kalana belemiu nombaumo palabuatan anu ma'idek.

⁵ Bansaku ingakalanmo nu to nabi-nabi anu lewa'mo nongkila-kilakon, mohumpakmo anu ma'ima' na mian anu lewa' mombee'i doi, panyo mongka'ideki ka' madi'mo mompalahatikan mian anu madi' mombee'i apa-apaa. Aha to nabi-nabi anu susumo aijo' Tumpu notatae,

⁶ “O to nabi-nabi tempo'nyo nu belemiu ohanimo lapas; batu nu sinaa makakinsapmo. Belemiu madi'mo montoa anu opoto'i na tanga'an-Ku iwi-iwi'. Belemiu madi'mo daagi' moko ala mongkila-kila apa-apaa.”

⁷ To mia-mian anu lewa' mongkila-kila sinaa anu aiya mae i ahop ma ambangmo kalana anu lewa' kinila-kilanyo madi' totu'u. Aha iwi-iwi' madi'mo daagi' opalesaya kalana Tumpu madi'mo montaami aha.

⁸ Panyo mongkona ibutongku aiya, Tumpu nombee'imo mae aku roh-Nyo tiba kuasa-Nyo. Aku binee'an-Nyomo balakat da monsumbu' ka'adilan ka' mule' kabaanian da moko ala mompoto'i hi aha mian nu Israel iwi-iwi', na anu binaumo nu aha.

⁹ Potombihing mae na potataengku aiya, o belemiu anu balakuasa i Israel anu nongka'idekimo ka'adilan ka' mule' nonggeo-geo'akonmo han anu totu'u.

¹⁰ Belemiu nombaumo Yerusalem kota' nu Tumpu, panyo lewa'mo nompatei mian ka' madi'mo kino ka adilannyo.

¹¹ Anu balakuasa i kota' lewa'mo nompalentah da mohumpak doi ponsogo', to ima-imam lewa' mompogulu'atulan nu Tumpu da mohumpak gaji, ka' to nabi-nabi momoita pokinde' hi Tumpu da mohumpak doi – lantas aha iwi-iwi' monsangka Tumpu daagi' monsangaja'i mae aha. Aha notatae, “Tumpu saja' daagi' aiya hi kita; kita madi' nukona mae nu balaa'.”

¹² Kalana palabuatan nu belemiu anu ma'idek aijo', Sion opajekomo susumo ale'. Yerusalem timbalimo tambulan nu laigan anu i hansunmo ka' mule' puge'nyo aita' pipinombauan Laigan nu Tumpu timbalimo alas ka' hemputonmo.