MIKHA 2 - KITAB NU TUMPU ALLA LELE MA'IMAI'

Nasip nu to mia-mian anu mongkabisa'i mian anu kasiasi

¹ Silakamo na to mia-mian anu nontanga'imo mombau anu ma'idek hau-haunyo male'-male' ikamale'an de pihimo lantas nu baumo subu-subu, kalana aha daagi' ko kamampuan de hahan anu sumo aijo'.

² De aha mongka'ima'imo sa'angu' na ale' nu mian nu agoimo nu aha. De aha mongka'ima'imo sa'angu' na laigan nu mian nu alamo nu aha. Mau halata' mau pe'e poto'utusan madi'mo ko anu mompaha kona.

³ Kalana aijo' Tumpu notataemo, “Aku ko tanga'anmo montuda'i balaa' belemiu sahingga belemiu madi' ko madi'nyo nu konamo ahi' nu balaa'. Toka i tempo'nyo anu soe' aijo' belemiu madi'mo daagi moko ala junjuhi na lumajang.

⁴ Nasib nu belemiu nu gunakonmo nu mian bau ponsindin ka' aha mongajanmo nyanyian anu onyanyiakon de ko anumo silaka, sumo uuka, ‘Tumpu nonsilakaimo lipu' mami aiya ka' mule' nombee'mo hi aha anu nomboamo kami. Kami memang ahi' ihansunmo totu-totu'u.’ ”

⁵ Kalana aijo' de tokamo na tempo'nyo saba' lipu' aijo' osule'akonmo ahi' hi mian anu palesayamo hi Tumpu, madi' ko samian pe'e na belemiu atina' mohumbahagiannyo.

⁶ To mia-mian binalakhotbamo mae hi belengku, koonyo nu aha, “Boli balakhotba mae hi kami. Boli balakhotbah mongkona han aijo' iwi-iwi'. Kami madi' mule' mohumpak ambang.

⁷ Boli monsangka aha mian nu Israel nu kutukimo nu Tumpu! Tumpu madi' mombau hahan anu sumo aijo'. Ia madi' toho' ka' madi' nu bau na kasabanan-Nyo. Temisa' Ia na madi' ahi' motatae ko pesa-pesa hi to mia-mian anu mombau han anu totu'u?”

⁸ Tumpu nontaami, “Belemiumo na anu nontumbuhi mian-Ku anu palesayamo susumo anu monsampobali. Mian ninsusule'mo mae i pahampatean ka' nontaha'imanimo au'aitu madi'mo ko anu mompoposia pada han ikiijo' mae belemiu nontanda'imo ahi' da mongagoimo laigannyo.

⁹ To bou-boune anu hi aha mian-Ku anu palesayamo i laa'mo nu belemiu da belemiu jojoongmo i laigan nu nu kalibosi nu aha, ka' belemiu nongagoi aijo' madi'mo daagi' osule'akon sampe toka sidu-sidutu' padahan aijo' anu binee'-Kumo salaku balakat hi to ana-anak nu aha.

¹⁰ Tinjomo ka' lako'mo i aiya madi'mo daagi' ko ka amanannyo. Iwi-iwi' na dosa' nu belemiu nompotokamo mae balaa' anu okabuhuk hondo i tampat aiya.

¹¹ Belemiu mongkahanda'i nabi anu mongka'ima'i baleko' ka' mongakali ka' lewa' mongkila-kila tukoonyo belemiu mohumpakmo anggur tiba inumon manjoo' hondo anu molangui.”

Kasalamatan jinanji'mo

¹² Tumpu notatae mule, “O, mian nu Israel anu daagi' tinontuha'! Belemiu Ku posihukmo ka' mule' Ku posa'angu'mo susumo domba anu ninsusule'mo mae i pangkunnyo. Susumo hemput padang anu kahomo domba, sumo aitumo na lipu' nu belemiu mompaka da'isanmo na miannyo.

¹³ Ku buka'mo na jalan ka' momboamo belemiu mosabat lengkat i tampat pinomboan ka' pinompojoongan belemiu. Opaha sulakonmo nu belemiu na tumban nu sabatan daka' ka' belemiu bebasmo na mamba. Akumo na Tumpu, aiyamo na Tomundo' nu belemiu ka' mule' Akumo na polaya' nu belemiu mosabat.”