MAZMUR 99 - KITAB NU TUMPU ALLA LELE MA'IMAI'

Tumpu, Tomundo' anu Talasanggo

¹ Tumpu aijo'mo na Tomundo'; to bansa-bansa langkakatan. Ia sumuhang aita' i to mala-malaekat, dunia gayu'an.

² Daka' hondo na kakuasa'an nu Tumpu i Sion; Ia talasanggo hondo molingkudui iwi-iwi' na bansa.

³ Bakas da aha mompuji' anu talalo hondo oholomati. Ia talalo hondo susi'!

⁴ Kakuasa'an olamo samata-mata hi Belento, Tomundo' anu mongka'ima'i atulan; Belento montoongimo atulan anu totu'u, Belento mompojalanmo atulan tiba ka'adilan hi aha Israel.

⁵ Oholomati ka' opopodaka' na Tumpunto anu talasanggo tolodadupumo i ahop nu kasuhangannyo ka' sombahmo na Ia. Ia talalo hondo Susi'!

⁶ I Musa tiba i Harun minsoopmo to ima-imam-Nyo, i Samuel sala'samian na anu binalado'amo hi Ia. Aha nonkakasemo hi Tumpu, ka' tinaaman-Nyomo mae.

⁷ Aita' mae i kundom Ia notataemo mae hi aha, aha tulu-tulutan hondo hi iwi-iwi' na atulan ka' palentah-Nyo.

⁸ O, Tumpu mami, Belento nontaamimo mae mian anu palesayamo hi Belento; Belento Tumpu anu mongka'oho' mongampuni aha. Maumo ahi' aha nuhukum nu Belento kalana kasala'an nu aha.

⁹ Oholomati ka' opopodaka' na Tumpunto, ka' sombahmo na Ia i Puge'-Nyo anu Ia na tumpu'nyo ka' anu susi' hondo, kalana susi' hondo na Tumpunto.