MAZMUR 94 - KITAB NU TUMPU ALLA LELE MA'IMAI'

Tumpu na momputusi iwi-iwi' mian

¹ O Tumpu, Belentomo na Tumpu anu mombalosi, potoamo mae na pombalasi nu Belento o, Tumpu.

² Pobungkutmo, o mian kopian nu dunia songko-songko, hukumo na mian anu takabun sitimbang tiba palabuatan nu aha.

³ O, Tumpu sampe toka hipian na kopinnyo, na mian anu ma'idek na kinyonyoanyo mongoa'i lame'? Sampe toka hipian na kopinnyo, O, Tumpu?

⁴ Aha lewa' montaloakon potatae anu ma'idek, ka' lewa' mongkabubulakon palabuatan ma'idek anu binaumo nu aha.

⁵ Aha lewa'mo nonsakisa mian anu pinalesayamo hi belento, o, Tumpu, ka' nompateimo to mia-mian anu pinile'anmo nu belento.

⁶ Aha nompateimo anu binalumo ka' to ana-anak anu madi'mo ko tuumanyo ka' tinanyo ka' mian anu i salipu'an anu jojoong i lipu' aiya.

⁷ Aha notatae, “Tumpu madi' montoa, Tumpu i Yakub madi' lewa' mompalahatikan mae.”

⁸ O, bansangku, boli ponga' susumo aijo', saba' ogunakon ahi' na pikilan nu beleyum!

⁹ Tumpu Allah na mombau bihing, iya mule' na ia madi' mohongo? Ia na nombau mata, iya mule' na Ia madi' montoa?

¹⁰ Ia na nompogulu' to bansa-bansa, iya mule' na Ia madi' mohukum? Ia na binau gulu' nu mian iwi-iwi', iya mule' na Ia madi' monsumbu' kapandean?

¹¹ Tumpu monsumbu' hondo pikilan nu, nusumbu' iwi-iwi' aijo' madi' ko kaliangannyo.

¹² Mohumpak kantumuu'an ma'ima' na mian anu lewa'mo pinokinde'an nu Belento, o, Tumpu, mian anu lewa'mo pinogulu' atulan nu Belento iwi-iwi'.

¹³ Pinosabanmo nu Belento na ia da madi' ko anu mompoposia i sinaa anu manjoo' hondo na balaa'nyo, sahingga okekemo na bolo' bau pohakop mian anu ma'idek na kinyonyoanyo.

¹⁴ Kalana Tumpu madi' hondo mompala'i mian anu palesayamo hi Ia; ia madi' ola mompojohok anu tinimbalimo pusaka'Nyo.

¹⁵ Sahingga atulan po'ule'mo ahi' otoongi totu-totu'u de momputusimo, iwi-iwi' na mian anu hodi' na kinyonyoanyo monsangaja'imo.

¹⁶ Ihe na montinjohi aku mohukum mian anu singkap palaganta? Ihe na monsangaja'i aku mongewa mian anu mombau anu ma'idek?

¹⁷ De bisuannyo Tumpu madi'mo montulungi mae aku, aku memang me ise-ise' nolalinmo i dunia nu mian anu sinilakamo.

¹⁸ Salatan tinutuganku tukoongku taalu' aku tohumpukmo, kalibosan nu Belento, Tumpu, po'ule'mo nompohoson mae aku tinuminjo.

¹⁹ De kinyonyoangku bata-batamo ka' mangada'mo Belentomo na mohase' mae ka' mompolame' aku.

²⁰ Belento madi' mosangaja' tiba to mia-mian kopian anu ma'idek na kinyonyoanyo, anu montanga'imo mombau anu ma'idek panyo monggunakon atulan.

²¹ Aha mombaumo kasangaja'an, mongewa mian anu hodi' na kinyonyoanyo, ka' mombee'imo hukuman silaka, mian anu madi' ko sala'nyo.

²² Panyo Tumpu na motinjohi mae aku, Tumpungku na monjagai mae aku.

²³ Ia mohukumo mian anu ma'idek na kinyonyoanyo sitimbang tiba palabuatan ma'idek anu binaunyomo, ka' mompomomo'mo nganga' nu aha kalana dosa' nu aha. Tumpunto mompomomo'mo nganga' nu aha.