MAZMUR 92 - KITAB NU TUMPU ALLA LELE MA'IMAI'

Nyanyian bau pompuji'

¹ Nyanyian anu onyanyi i sinaa nu Sabat.

² Totu-totu'u ma'ima' hondo na montalima kase hi Belento, O Tumpu, ka' mompuji' Belento, Tumpu Allah Anu Daka' hondo na Kuasanyo;

³ mombebakon kalibosan nu Belento salatan subu-subumo, ka' kanonongan nu Belento salatan pihimo.

⁴ Okuti'akon gitan anu sampu-sampulu' na bantangnyo, opohingga-hinggatakon gambus tiba kasapi'.

⁵ Kalana palabuatan nu Belento momposanang hondo kinyonyoang-Ku, aku lame' hondo na manyanyi kalana montoa kalaja nu Belento.

⁶ Talalo hondo daka' na hahan anu binaumo nu Belento, O, Tumpu, talalo hondo maleeng na pikilan nu Belento!

⁷ Mian anu ponga' madi' hondo moko ala monsumbu' mian anu waweng madi' moko ala mompangalatii.

⁸ Ku gantang mian anu palaganta tumuu'mo molumba' susumo hemput, ka' mian anu ma'idek na kinyonyoanyo mompaka kayamo ka' mompaka bilahimo; panyo aha opateimo madi'mo ko anu opotuha',

⁹ kalana Belento, Tumpu, na balakuasa sampe toka sidu-sidutu'.

¹⁰ Osumbu' mami sampobali' nu Belento opateimo ingko-ingkot, o, Tumpu, iwi-iwi' na mian anu ma'idek na kinyonyoa oga'a-ga'at madi'mo oposa'angu'.

¹¹ Pinohosonmo nu Belento na aku susumo sapi' anu ma'ela', ka' nombalakatimo mae aku, da nohumpakmo kantumuu'an ma'ima'.

¹² Aku nontoamo anu nompobali' mae nahungku'mo, to mia-mian anu tinontinjomo nongewa mae aku, iwi-iwi' na tanga'an nu aha anu ma'idek i hongongkumo.

¹³ Mian anu hodi' na kinyonyoanyo nilondekmo susumo kurma, ka' nolumba'mo na tinumuu' susumo kau' lontio' nu Libanon.

¹⁴ Aha sumomo kau' anu sinu'an kiijo' i Laigan nu Tumpu, ka' nodensu'mo na kodaka'nyo kiijo' i Laigan nu Tumpu Allah-nto.

¹⁵ Kau' anu daagi' saja' mimbua' maumo ia talalomo hondo pinin na tinumuu', panyo sabole-boleh molumba' ka' molunoi.

¹⁶ Aijo'mo na tanda bau pontoan saba' Tumpu memang adin; Ia na nontinjohi mae aku, madi' ko han anu tageo' hi ia.