MAZMUR 88 - KITAB NU TUMPU ALLA LELE MA'IMAI'

Do'a mongkakase da otulungi mae

¹ Nyanyian. Mazmur nu aha sa'anakan mae i Korah. Anu mongkapalai panyanyi. Ingala i lagu nu nyanyian: Mahalat Leanot, Nyanyian pangajalan i Heman, mian nu Ezrahi.

² O, Tumpu, Tumpu Allah anu nomposalamatmo aku, de sinaamo aku mongkakasemo hi Belento, de pihimo aku mangadapmo hi Belento.

³ O'amalakon da do'angku toka ahi' hi Belento, potombihingakon mae na anu ku kakase aiya.

⁴ Nanjoo'mo na kasusa'an anu nontokaimo mae aku; kasilakan aiyamo mae i ahop nu sabatan.

⁵ Aku sumomo mian anu mintatau'mo mokaiyong i bolo' nu kubun, mian anu ningkotmo na kahosonan.

⁶ Aku pinala'ianmo aijo' hi mian anu sinilakamo, sumomo mian anu pinateanmo, nanimbandangmo i uno nu kubulan, susumo mian anu kinolilimanmo nu Belento totu-totu'u, mian anu madi'mo daagi' nutulungi nu Belento.

⁷ Aku ingalinmo nu Belento i uno nu bolo' anu maleeng hondo i uno nu liang nu kubun anu maleeng hondo ka' mule' pintung.

⁸ Tambuha' nu Belento na nompaka piboatimo aku nokaiyong aku nahutemo kalana ingutunanmo nu tambuha' nu Belento.

⁹ To mia-mian anu mompahasumbu' tiba aku pinojo'onmo nu Belento hi belengku, ka' pinotimbalimo nu Belento na aku da mompobubun nganga' nu aha. Aku pinojoongmo nu aha kiijo' i unonyo ka' madi'mo noko ala nosabat,

¹⁰ matangku madi'mo talalo nontoa-toa kalana sinansalamo. Sansina-sinaa aku mongkakase hi Belento, o, Tumpu, ka' balado'a ku potala na limangku.

¹¹ Te mian anu sinilakamo na pompotoan nu Belento anu okabangangi? Te aha daagi' po'ule' tumuu' ka' mompuji' Belento?

¹² Te toho' mule' kalibosan nu Belento opolele i uno nu kubulan, ka' mule' kanonongan nu Belento i tampat kasilakan?

¹³ Te Belento nombau anu okabangangi ko anu monsumbu' kiijo' i uno nu pintung, kabai kanonongan nu Belento i lipu' kajojoongan nu anu kinolilimanmo?

¹⁴ Panyo aku mongkakase da otulungi mae nu Belento o, Tumpu, de subu-subumo ku potokamo hi Belento na do'angku.

¹⁵ O, Tumpu kadaka' Belento madi'mo mongkalinga aku? Kadaka' Belento mosiloimo madi'mo montoa mae aku?

¹⁶ Daagi' pe'e ise-ise' na aku sinansalamo, ka' iyoo'mo nu kasilakan, aku madi'mo kinogawe apa-apaa na montanggung hukuman nu Belento.

¹⁷ Tambuha' nu Belento anu okabuhuk hondo nohionsuhimo aku, kabaanian nu Belento anu okabuhuk hondo nolambanimo mae aku sahingga aku sinilakamo.

¹⁸ Sansina-sinaa tambuha' nu Belento sumomo iaba' anu nontikumo mae aku nontumbuhimo mae aku lengkat mae iwi-iwi na tampat.

¹⁹ To sanga-sangalungku anu mompahasumbu' hondo pinojo'onmo nu Belento hi belengku, memo ahi' kapintungan na monsangalui mae aku.