MAZMUR 87 - KITAB NU TUMPU ALLA LELE MA'IMAI'

Bau pompuji' Yerusalem

¹ Sa'angu' na nyanyian. Mazmur nu aha sa'anakan i Korah. Tumpu nompotinjomo kota'-Nyo aita' i puge'-Nyo anu susi', anu Ia na Tumpu-Nyo.

² Iwi-iwi' na kota' i Israel, Yerusalemo na anu talalo hondo nu kalibosi.

³ Potombihing mae, o, kota' nu Tumpu Allah, hahan anu okabangangi pinoto'inyomo apaa na anu binaumo nu belento;

⁴ “Mesir tiba Babel Ku posoopmo i daputan nu to bansa-bansa anu tulu-tulutan hi Belenku. Ka' mule' Filistea, Tirus tiba Sudan ninsoopmo i lekengan nu mian anu jojoong i Yerusalem.”

⁵ Mian motataemo hi Sion, tukoonyo iwi-iwi' na bansa minsoopmo gampanyo ka' Anu Matangkas na Kuasanyo na nontantukanmo ia.

⁶ Tumpu momposoopmo iwi-iwi' na bansa i daputan nu to mia-mian anu jojoong i Yerusalem.

⁷ Aha monsaleleimo ka' manyanyimo, “Sion aijo'mo na tampat pinolengkatanku mae!”