MAZMUR 85 - KITAB NU TUMPU ALLA LELE MA'IMAI'

Do'a mongkakase da mohumpak ka'ima'an na kantumuu'an nu bansa

¹ Anu mongkapalai panyanyi. Mazmur nu aha sa'anakan i Korah.

² Belento mongka'ima'i tano' nu Belento o, Tumpu kantumuu'an nu aha Israel po'ule'mo pinokopianan nu Belento.

³ Belento nongampuni dosa' iwi-iwi' nu mian anu palesayamo hi Belento; ingampunanmo nu Belento na kasala'an nu aha iwi-iwi'.

⁴ Aha madi'mo tinambuha'an nu Belento; tambuha' nu Belento anu taha-tahahumo po'ule'mo ingampunan nu Belento.

⁵ Po'ule' mae pokopiani na kantumuu'an mami o, Tumpu Allah anu momposalamat kami, bolimo po'ule' otambuha'i mae na kami.

⁶ Pa' sidu-sidutu'mo na belento montambuha'i mae kami, ka' sabole-bolemo motambuha' sampe molundu-lundu na tulunan?

⁷ Po'ule' mae pohosonakon na kami da lame' na kinyonyoa nu kami mian anu palesayamo hi Belento, kalana tinulunganmo nu Belento.

⁸ Potoa mae hi kami da osumbu' mami taalu' sabole-boleh ahi' na Belento mongkalibosi mae, o, Tumpu, bee'i mae na kami kasalamatan anu lengkat mae hi Belento.

⁹ Aku nohongomo potatae nu Tumpu; ia nonjanji'mo ka'ima'an nu kantumuu'an hi kita, mian anu palesayamo hi Ia, asan kita bolimo po'ule' mombau dosa'.

¹⁰ Memang Ia ko kahanda' momposalamat anu tulu-tulutan. Tumpu anu talasanggo hondo jojoongmo i lipu'to aiya.

¹¹ Kalibosan ka' tulu-tulutan mompaha singkabotmo ka'adilan ka' kadamean mompaha tanggo-tanggogolimo.

¹² Tulu-tulutan nu manusia molengkatmo mae i dunia aiya, ka' ka'adilan nu Tumpu montoamo mae lengkat i langit.

¹³ Tumpu mombee'imo mae anu ma'ima', sahingga tano' to mombee'imo hasinnyo.

¹⁴ Ka'adilan na mamba mae momona, ka' momposadia kajalanan-Nyo lapas aijo' tokaje mae na Tumpu.