MAZMUR 83 - KITAB NU TUMPU ALLA LELE MA'IMAI'

Do'a mongkakase da otulungi mae na mongewa sampobali'

¹ Sa'angu' na nyanyian. Mazmur i Asaf.

² O Tumpu, boli tongo, boli ola basolung lima ka' momohokot.

³ Soba toa, na anu monsampobali' beleyum molambanimo mae, to mia-mian anu mongka'ideki belento motomuhukmo mae.

⁴ Aha nombaumo tanga'an anu ma'idek da o'ewamo na mian anu palesayamo hi Belento; ka' nonsale'akonmo da o'ewamo na to mia-mian anu nujagai nu Belento.

⁵ Aha notataemo, “Imbo' da osilakaimo iwi-iwi' na bansa Israel, da sanggo nu aha madi'mo daagi' o'inau'.”

⁶ Iwi-iwi' na bansa nosa'angu'mo, ka' nombaumo kasangaja'an mongewamo Belento:

⁷ bansa Edom ka' Ismael, to mia-mian nu Moab tiba Hagar;

⁸ bansa Gebal, Amon tiba Amalek, bansa Filistea ka' mule' anu monjojoongi Tirus.

⁹ Ka' mule' Asyur suele nosa'angu'mo tiba aha, nowakinimo mae lee' i Lot.

¹⁰ Baumo na aha susumo mian nu Midian, susumo i Sisera tiba i Yabin i Kaunyo nu Kisyon.

¹¹ Anu sinilakamo kiijo' mae i Endor, ka' tinimbalimo lompo' nu tano'.

¹² Baumo na to pola-polaya' nu aha susumo hi Oreb tiba hi Zeeb, patundu'mo na anu mongkuasai aha susumo hi Zebah tiba hi Salmuna,

¹³ kalana aha notataemo, “Imbo' da ojojoongintomo na tano' kajojoongan nu Tumpu.”

¹⁴ O Tumpu, sagakonmo na aha susumo abu', susumo haat nupuhimo nu mombun.

¹⁵ Susumo apu anu mompapuimo alas, moak nu apu anu montoyo'imo bungkutnyo iwi-iwi'.

¹⁶ Loloi'mo na aha nu antong daka' nu Belento, potolokengkeng na aha nu baleba' anu makansang hondo nu Belento.

¹⁷ O, Tumpu Allah, bakas na aha lewa' o'alu, da nu akui nu aha na kakuasa'an nu Belento.

¹⁸ Bakas na aha saja' opopo'ambang ka' saja' mongoa'i mabuhuk, bakas na aha silaka kalana nusaduakon lewa'mo o'alu.

¹⁹ O'amalakon da nusumbu' nu aha taalu' olamo ahi' Belento na Anu matangkas na Kuasa-Nyo Tumpu, anu mongkuasai songko-songko na dunia.