MAZMUR 82 - KITAB NU TUMPU ALLA LELE MA'IMAI'

Tumpu, Tomundo' anu Talasanggo

¹ Mazmur i Asaf. Tumpu nompimpinmo sidang nu aha Tumpu kiita' i suluga, lantas Ia nompoto'imo kaputusan-Nyo:

² “Bolimo daagi' mombee'i kaputusan anu madi' adin, ka' boli montinjohi mian anu ma'idek na kinyonyoanyo.

³ Tinjohi na anak anu unon, anu madi'mo ko tuumanyo ka' tinanyo ka' mian anu madi'mo mahoson, bee'i ka'adilan na mian kasiasi ka' anu sansala na kantumuu'annyo.

⁴ Pobebasakon na mian anu madi' mahoson ka' madi'mo moko ala, mombau apa-apaa, opimpaliakon na aha da boli nusilakai nu mian anu ma'idek na kinyonyoanyo.

⁵ Belemiu madi' ko anu opisumbu-sumbu', ponga' ka' sala' na bapikin, kalana belemiu, sahingga atulan nu kantumuu'an nu mian da'isan tinabuntala'mo.

⁶ Aku notataemo tukoongku belemiu aiya sipatnyo sumo Tumpu belemiu iwi-iwi' to ana-anak nu Tumpu Anu Daka' na Kuasa-Nyo.

⁷ Panyo belemiu silakamo saidi' mae susumo manusia, susumo aha mian daka' silaka, komiu suele susumo aijo'mo silaka.”

⁸ Tokamo mae o Tumpu, bee'i mae kaputusan na dunia aiya, kalana iwi-iwi' na bansa Belento na Tumpu-Nyo.