MAZMUR 81 - KITAB NU TUMPU ALLA LELE MA'IMAI'

Nyanyian de mombaumo lamean

¹ Anu mongkapalai panyanyi. Ingala i lagu nu nyanyian: Gitit. Lengkat hi Asaf.

² Nyanyiakon na nyanyian anu bau pompuji' Tumpu, anu timbalimo kahosonanto. Opolame' na montaligalai Tumpu i Yakub.

³ Hapa'i na gandang, ka' lewa'mo panyanyi, kuti' na gambuus ka' kasapi', po'ima' na onyi'nyo da molibos na mohongo.

⁴ Puhi na tolompet de tokamo na sinaa momolame'an mo na kita, i bau-bauon bitu'on bu'ou ka' bitu'on timpodonmo.

⁵ Kalana han aijo' sa'angu' na atulan hi aha Israel, sa'angu' na palentah lengkat mae hi Tumpu i Yakub.

⁶ Ia nombaumo sa'angu' na katantuan hi bansa Israel, tempo'nyo Ia nambamo nongewa Mesir. Aku nohongomo basa' anu madi' ku sumbu',

⁷ “Aku nompasi'akonmo kolonon anu maboat atina' i bikoang nu beleyum, ka' nompengasmo kalanjang anu o kolon atina' totoong i lima nu beleyum.

⁸ Tempo'nyo belemiu sinusa'mo, belemiu notataemo mae nongkakase, sahingga aku nomposalamatmo belemiu. I uno nu gohung pipinaninsulukanku tinaamankumo mae na belemiu, inguji'kumo na belemiu i mata nu uee Meriba.

⁹ Potombihing mae na pokinde'ku o, belemiu mian anu palesayamo hi belengku, O, Israel, de belemiu mongka'oho' mohongo Aku!

¹⁰ Boli ko anu atina' hi belemiu daagi' ko anu palesaya hi pilogot sangga'at, boli monsombah pilogot nu aha mian anu i salipu'an.

¹¹ Akumo na Tumpu nu belemiu, anu nolaya'mo mae belemiu nosabat lengkat mae i Mesir. Tempo'nyo belemiu no'ohopmo kalana madi'mo ko anu okaan, binee'an-Kumo anu okaan na belemiu.

¹² Panyo mian anu palesayamo hi belengku, madi'mo mohongo-hongo aku. Israel madi'mo tinulu-tulutan hi belengku.

¹³ Kalana aijo' pinojoho-Kumo na aha da pinanggagamo, bakasmo na aha da mombatukimo posi pongka'oho' nu aha.

¹⁴ Ha, de maluannyo mian anu palesayamo hi belengku mohongo-hongomo aku, de maluannyo aha tulu-tulutanmo hi belengku,

¹⁵ saba' aku sampamo lia-lia' mompatundu' sampobali' nu aha, ka' mompokalahmo iwi-iwi' na anu mongewa aha.

¹⁶ Mian anu mongka'ideki mae aku, ku patundu'mo, aha mohumpakmo hukuman sampe toka sidu-sidutu'.

¹⁷ Panyo mian anu palesayamo hi belengku, Ku bee'i mongkaan gandum anu pinile'anmo, ka' Ku pobosumo nu juu' nu uani' anu o sunu i uno nu alas.”