MAZMUR 8 - KITAB NU TUMPU ALLA LELE MA'IMAI'

Tumpu anu talasanggo hondo ka' kinyonyoa nu manusia anu ma'ima' hondo

¹ Anu mongkapalai panyanyi. Lagunyo ingala ilagu i Gitit. Mazmur i Daud.

² O Tumpu, Tumpu mami, kuasa nu Belento talasanggo hondo i dunia songko-songko! Talasanggo hondo na Belento nu lingkudui na kotangkasnyo nu langit

³ onyanyiakon nu to ana-anak ka' to bunga-bunga mea'. Belento mompalentah sinukupmo hondo madi'mo opoko ala opoposia sahingga nganga' nu mian anu monsampobali' mae ka' mongewa madi'mo noko ala notatae.

⁴ De ku sinda mokiita' na langit anu pinotimbalimo nu Belento bitu'on ka' to manda-mandala' anu pinokonamo aita' mae nu Belento,

⁵ te apaamo na manusia aijo' sahingga nu inau' nu Belento na ia ihe na ia, sahingga nupotuu' nu Belento?

⁶ Panyo nuhangkat nu Belento na ia mompai pokakanamo tiba Tumpu, pinokonanmo nu Belento mahkota' na ia nu sanggo anu talasanggo ka' kaholomatan.

⁷ Binee'anmo nu Belento kuasa na ia mompalentah dunia songko-songko, iwi-iwi' na anu pinotimbalimo nu Belento pinotundu'mo hi ia:

⁸ domba, sapi' ka' potuu'on iwi-iwi', ka' suele binatang i padang tampat anu talalo hondo ewa;

⁹ to tomo-tomonsi' ka' to ika-ikan, iwi-iwi' binatang anu pinotimbalimo i ndalangon.

¹⁰ O Tumpu, Tumpu mami, katalasanggoan nu Belento tinalapuji'mo i songko-songko na dunia.