MAZMUR 79 - KITAB NU TUMPU ALLA LELE MA'IMAI'

Do'a mongkakase da bansa opobebasmo mae

¹ Mazmur i Asaf. O Tumpu Allah, bansa anu madi' monsumbu'i Belento nonjojoongimo tano' pusaka' nu Belento. Aha nongkotonimo Laigan nu Belento, Yerusalem binaumo tambulan nu anu singkapmo na'idek.

² Bangke' nu to posa-posaihon nu Belento pinala'ianmo nu aha, binaumo kaanon nu to tomu-tomonsi' anu lumahap i langa. Bangke' nu to mia-mian anu, nu kalibosi nu Belento pinojohokmo nu aha binaumo kaanon nu binatang anu ma'ela'.

³ I kota' nu Yerusalem songko-songko baso' nu aha nobubusmo susumo uee; madi'mo ko anu nolamun aha.

⁴ Kami tinimbalimo han anu lewa' o aluu ka' okokojoi nu to bansa-bansa anu mompaha ohani, aha lewa' mongkokojoi ka' mongalu kami.

⁵ O, Tumpu, sampemo toka sidu-sidutu' na Belento motambuha' ka' kinyonyoa nu Belento anu saja' madi' sanang hi kami sabole-bolehmo mook susumo apu?

⁶ Baumo totu-totu'u, na Belento motambuha' hi to bansa-bansa anu madi' monsumbu'i Belento ka' hi aha to kala-kalaja'an anu madi' monsombah Belento.

⁷ Kalana aha nompateimo mian anu palesayamo hi Belento, ka' nohansuhimo tampat kajojoongan nu aha.

⁸ Boli mohukum mae kami kalana dosa' nu mompolee' mami. Sampamo mae kalibosi na kami kalana madi'mo koanu otaha'imani mami.

⁹ Tulungiakon mae na kami o, Tumpu, Anu momposalamat mae kami, ampuniakon mae na dosa' mami iwi-iwi' ka' pobebasmo mae na kami da Belento o holomati.

¹⁰ Boli opobee' na bansa sangga'at mompokilawa mae kami “Iya mae na Tumpu nu aha?” Bakas da kami montoa to bansa-bansa obalosakon anu mompateimo to posa-posaihon nu Belento.

¹¹ Potombihingakon mae na tando' nu to mia-mian anu i uno nu talungku'; o'amalakon da to mia-mian anu tinantukanmo osilakai opobee'mo da boli osilakai kalana kakuasa'an nu Belento.

¹² O, Tumpu, balosakonmo na to bansa-bansa haha aijo' pimpitun lipat, kalana iwi-iwi' na alu anu mompopo'ise' Belento binaumo nu aha.

¹³ Sahingga kami mian anu palesayamo hi Belento, domba anu, nulaya' nu Belento montalima kasemo hi Belento sampe toka sidu-sidutu', ka' mompuji'mo Belento sampe molundu-lundu na tulunan.