MAZMUR 77 - KITAB NU TUMPU ALLA LELE MA'IMAI'

Bau pohase' de susa'mo

¹ Anu mongkapalai panyanyi. Ingala i lagu nu nyanyian: i Yedutun. Mazmur i Asaf.

² Pinohosonkumo na aku notatae nongkakase hi Tumpu; pinohosonkumo na aku notatae nongkakase, ka' ia nohongomo mae aku.

³ Tempo'nyo sinusa'mo hondo, aku binalado'amo hi Tumpu; Sampahu-pahu ku hangkat na limangku mokiita' hi Ia madi' aku ma'osa, panyo kinyonyoangku madi'mo mongka'oho' ohase'.

⁴ De tonginau'mo na aku hi Tumpu, ku poto'imo na anu ku kahanda'i de ku potutugakonmo, kinyonyoangku mompaka lusemo.

⁵ Nu pobikayaonmo mae nu Tumpu na aku da madi' moko ala to hoyot pihi kinyonyoangku madi'mo sanang sahingga madi'mo moko ala motatae.

⁶ Mompotutugakon kantumuu'anku sansina-sinaa anu i hikuhakonmo, saja' ku inau' ka' ku potutugakon na kantumuu'anku itaun-taun anu i hikuhakonmo.

⁷ De pihimo sola'mo ku potutugakon, ka' lewa' ogogisa' i uno nu kinyonyoa.

⁸ “Pa' toka-tokamo sidu-sidutu' na Tumpu madi'mo mae monginau' ka' madi'mo daagi montalima?

⁹ Pa' Ia madi'mo mongkalibosi kami? Pa' madi'mo daagi' Ia mongganapi palajanjian-Nyo?

¹⁰ Pa' kinolilimanmo nu Tumpu na mongkalibosi? Pa' notambuha'mo na Ia, sahingga madi'mo daagi' ko kalibosan?”

¹¹ Lantas aku notataemo, “Aiyamo na anu monsakiti kinyonyoangku, tukoongku Anu Matangkas na Kuasa-Nyo madi'mo daagi' balakuasa.”

¹² Aku tinolo'inau'mo hi palabuatan-palabuatan nu Belento Tumpu, nompotutugakonmo hahan anu binaumo nu Belento ka' okabangangi tempo'nyo naipuan mae.

¹³ Aku nompopikilakonmo iwi-iwi' na anu binaumo nu Belento, ka' nompopikilakonmo anu binaumo nu Belento anu madi'mo ko gampa-gampanyo.

¹⁴ O, Tumpu, iwi-iwi' na palabuatan nu Belento susi' hondo, ihe na anu sumo Tumpu mami, anu daka' hondo na kuasa-Nyo?

¹⁵ Belentomo na Tumpu anu nombaumo hahan anu okabangangi, kuasa nu Belento, pinonyata'mo nu Belento hi to bansa-bansa.

¹⁶ Kalana Belento mahoson sahingga pinobebasmo nu Belento na mian anu palesayamo hi Belento, tulunan i Yakub ka' i Yusuf.

¹⁷ Nontoa Belento, o, Tumpu, uea nabuhukmo, memang lananyo nu ambai suele i lakatnyomo.

¹⁸ Kundom nontudunakonmo mae ujan, gohung dinolundunganmo; kilat pinojo-pojohonjitmo iyaya mae.

¹⁹ Gohung pinoli polintupo, kilat pinokalapitmo, dunia ginayu'anmo ka' i lakatnyomo.

²⁰ Belento i lumajangmo nontulu bokon, i lumajang i ndalangon, panyo lawo nu Belento madi' tinoa-toa.

²¹ Susumo anu lewa' molaya' potuu'on, Belento nontakamo mian anu palesayamo hi Belento, nonggunakonmo i Musa tiba i Harun.