MAZMUR 76 - KITAB NU TUMPU ALLA LELE MA'IMAI'

Tumpu na anu mohungku'i iwi-iwi'

¹ Anu mongkapalai panyanyi. Kinuti'akon kasapi. Mazmur i Asaf. Nyanyian.

² Tumpu tinalasanggomo i Yehuda, sanggonyo tinogilelemo i Israel.

³ Yerusalem aijo'mo na kajojoongan-Nyo; Puge'nyo nu Sion tampat kajojoongan-Nyo.

⁴ I kiijo'mo mae na Ia nohansuni iwi-iwi' na pakakas anu pinake nahampate, iwi-iwi' na pana' anu lonyingkaban, kanta, tiba bajak.

⁵ Totu-totu'u talasanggo hondo na Belento, ka' ma'ima' na otoa to bungku-bungkutnyo anu salatanmo pe'e dunia aiya i lingkuduanmo nu Belento.

⁶ To mia-mian anu baani ingagoanmo; aha ka' madi'mo daagi' mobula. To sulu-suludadu anu toto babaani hondo madi'mo nahoson.

⁷ Iwi-iwi' na ajahan tiba anu monsake'i nanabu'mo ka' sinilakamo kalana sineganmo nu Belento, o, Tumpu Allah i Yakub!

⁸ Totu-totu'u Belento okabuhuk hondo. De Belento motambuha'mo, ihe na moko ala mongahopi?

⁹ Itina' mae i langit pinoto'imo mae nu Belento na kaputusan nu Belento; dunia nabuhukmo ka' nomohokotmo.

¹⁰ Salatan Belento nobungkutmo, kahanda'mo momputusi da oposalamatmo na mian anu sinakisamo i dunia aiya.

¹¹ Maumo to mia-mian anu buhingison hi sangko mian mompuji'mo Belento, ka' anu daagi' motambuha' nompusokmo kalung salaku tanda ko anumo sinilaka.

¹² Ganapimo na anu jinanji'mo hi beleyum hi Tumpu nu beleyum. Tionyo ahi' iwi-iwi' na bansa anu ohani na kajojoongannyo momboamo palasombahannyo hi Tumpu anu okabuhuk.

¹³ Ia nolepo'imo kabaanian nu to mia-mian anu balakuasa; to tomu-tomundo' i lakatnyomo na mongahopi Ia.