MAZMUR 74 - KITAB NU TUMPU ALLA LELE MA'IMAI'

Do'a da opomaladeka mae na bansa

¹ Nyanyian pangajalan i Asaf. O, Tumpu, pa' sidu-sidutu'mo na Belento mompala'i kami? Kadaka' sampamo, montambuha'i na Belento posi mian nu Belento anu palesayamo hi Belento?

² Inau'akon mae na mian anu palesayamo hi Belento anu salatanmo pe'e naipuan mae pinile'anmo nu Belento, bansa anu pinobebasmo nu Belento da Belentomo na tumpu-Nyo. Inau'akon mae na Puge'nyo nu Sion, anu binaumo kajojoongan nu Belento.

³ Mamba mae toakon na tampat anu nohobo-hobo'mo; iwi-iwi' na anu i laigan nu Belento i hansuhanmo nu sampobali'.

⁴ Anu monsampobali' mae Belento lewa'mo, nolo ais i laigan nu Belento, ka' lewa'mo nompototoni bandela' i kiijo' salaku bau pontandai aha inguntungmo na nahampate.

⁵ Aha sumomo mian anu montaa' kau' nontangkakonmo bobolo'nyo kahanda'mo, montaa' kau' iwi-iwi' i uno nu alas.

⁶ Iwi-iwi' na anu ingukin na kau' ingideanmo nu aha nu bobolo' ka' malatelu daka-daka'.

⁷ Laigan nu Belento pinapuanmo nu aha sahingga no'angotmo; ka' nahumimi'imo na tampat ponsomban Belento.

⁸ Aha kahanda'mo, mompatundu' kami ingko-ingkot, ka' mompapuimo iwi-iwi' na tampat anu bau ponsomban Tumpu i lipu' aiya.

⁹ To nabi-nabi ka' tanda-tanda anu okabangangi madi'mo daagi' tinoa, ka' madi' ko anu monsumbu' pa' hipianje na anu susumo aiya belentimo.

¹⁰ Hipianje na belenti, O, Tumpu, na anu monsampobali' mae belentimo madi'mo mongkokojoi Belento? Pa' sampemo toka sidu-sidutu' na aha mongalu sanggo nu Belento?

¹¹ Kadaka' Belento madi'mo montulungi mae kami? Kadaka' Belento nompojohokmo mae kami?

¹² Salatanmo pe'e momonanyo Belentomo na tomundo'ku, o, Tumpu, Belentomo na nomposalamat mae kami.

¹³ Tiba kahosonan anu daka' hondo ka' anu madi' opoko ala opokakanai, Belento nongga'atmo ambai ka' nompahantohakakonmo ubak nu ulo anu toto daka-daka' i ambai.

¹⁴ Belento nompohintutumo iwi-iwi' na ubak nu Lewiatan ka' nompotimbalimo ia kaanon nu anu jojoong i tampat padang anu mateges.

¹⁵ Belento nompotimbalimo da mata nu uee ka' kaunyo mo'ili; kaunyo anu daka' pinotimbalimo nu Belento da no'oti.

¹⁶ Belentomo na nompotimbali sinaa tiba pihi, ka' nontantukanmo tampat nu batu nu sinaa ka' bitu'on.

¹⁷ Belento nontantukanmo toka iya na puusnyo nu dunia, nontantukanmo tempo' nu posinaa ka' tempo' nu ehua.

¹⁸ Inau'akon mae mosia na anu monsampobali' mae kami nongalumo Belento, o, Tumpu, bansa anu madi' monsumbu' Belento nompisala'imo sanggo nu Belento.

¹⁹ Boli mombee' mian anu palesayamo hi Belento anu madi'mo moko ala mombau apa-apaa i lima nu mian anu monsampobali' mae, anu tala-talalomo hondo sininggi. Boli sampemo toka sidu-sidutu' na mongkolilimi mae kantumuu'an nu mian anu palesayamo hi Belento anu nonta'aupmo kasusa'an aiya.

²⁰ Boli okolilimi na palajanjian nu Belento hi kami kalana mian anu taha-tahahumo na singgi mombau apa-apaa, iyaya mae na tampat anu madi' osumbu' i lipu' aiya.

²¹ Boli mae opojohok na mian anu pinosansalamo, opopo'ambang, o'amalakon da mian anu sinakisamo ka' kinasiasimo mompuji' Belento.

²² Pobungkutmo mae o, Tumpu, tinjohi mae na palakala nu Belento! Kalana sansina-sinaa saja' o'alu na Belento nu to mia-mian anu madi' palesayamo hi Belento.

²³ Boli okolilimi na anu monsampobali' mae Belento lewa'mo nolo'ais, lewa'mo i hengge' na aha anu mongewa Belento ka' kinodaka-daka'nyomo na ais nu aha!