MAZMUR 73 - KITAB NU TUMPU ALLA LELE MA'IMAI'

KITAB KO TOTOLU'NYO 73–89 Ka'adilan nu Tumpu

¹ Mazmur i Asaf. Manonong hondo na Tumpu Allah hi mian anu palesayamo hi Ia, ka' mule' hi mian anu kinyonyoanyo hodi'.

² Panyo no banga'mo na pikilanku me ise-ise' aku madi'mo pinalesaya hi Tumpu,

³ kalana aku nongka'idekimo mian anu saja' takabun, salatan aku nontoamo mian anu ma'idek na kinyonyoanyo nohumpakmo dale'.

⁴ Kalana aha madi' nongoa'i lanit, butong nu aha mahoson ka' mule' madi' panyakiton.

⁵ Aha madi' nongoa'i kasusa'an madi' tinokan mae nu balaa' susumo mian sangga'at.

⁶ Kalana aijo' aha binuulonmo, ka' saja' singgi na mompalentah.

⁷ Kiijo' i uno nu kinyonyoa nu aha tombulokmo maena kalakuan anu ma'idek, aha saja' mompopikilakon tanga'an anu toto ide-idek.

⁸ Aha lewa' mongalu ka' mule' lewa' mompobau-bau anu madi' totu'u, ka' ko bubuunmo, motombuhuk kalana kahanda'mo mompakisa.

⁹ Aha mompisala'imo Tumpu kiita' i suluga' ka' lewa' monsisik anu madi' totu'u hi to mia-mian anu i dunia aiya,

¹⁰ sahingga suele mian anu palesayamo hi Tumpu montulutimo aha, ka' mule' palesayamo hi sisik nu aha.

¹¹ Aha notatae, “Tumpu madi' monsumbu', Anu Matangkas na Kuasanyo madi' mangalati'”

¹² Sumo aijo'mo na kalakuan nu mian anu ma'idek na kinyonyoanyo; kantumuu'an nu aha tenda, halata' nu aha ko pintu-pintuangnyomo.

¹³ Ola palansuma' na aku monjagai kinyonyoangku da belesi'; madi' kogunanyo na aku mompimpali dosa'.

¹⁴ Kalana sansina-sinaa aku saja' nu tokai mae nu balaa'; de subu-subumo aku osakisamo.

¹⁵ De aku motataemo sumo aijo', aku nombaumo anu madi' ma'ima' hi to ana-anak lee' nu belemiu.

¹⁶ Panyo tempo'nyo aku binala'usahamo da kusumbu' na han aijo' aijo' talalo hondo mahan hi belengku.

¹⁷ Ahennyo aku ninsoopmo i Laigan nu Tumpu lantas aku nangalati'mo mosia na kantumuu'an nu mian anu ma'idek na kinyonyoanyo saidi' mae imihinyo.

¹⁸ Pinojoongmo nu Belento na aha i jalan anu malondo, ka' pinojohokmo nu Belento na aha da silakamo.

¹⁹ Ola sinangkinihap aha sinilakamo talalo ahi' okabuhuk na kina'ahenannyo nu aha,

²⁰ Susumo anu ingipi subu-subu mae okolilimimo salatan Belento nobungkutmo, o, Tumpu aha mule' suele madi'mo tinoa-toa.

²¹ Salatan aku nompele-pele'mo ka' kinyonyoangku sumomo anu sinusuk,

²² aku pinonga'mo ka' madi'mo nangalati' aku sumomo binatang i ahop nu Belento.

²³ Panyo aku na sabole-boleh ahi' saja' koko hi Belento Belento na nontoongimo mae limangku koanan.

²⁴ Belento na lewa'mo nolaya aku nu pokinde' ka' saidi' mae nu talima na aku nu kaholomatan.

²⁵ Ihe na anungku kiita' i suluga', olamo ahi' samata-mata Belento? Madi' ko anu ku ka'ima'i sangga'at i dunia aiya, olamo ahi' samata-mata Belento.

²⁶ Maumo ahi' santuu'ku ka' butongku madi'mo moko ala mombau apa-apaa, Belento na timbali bau kahosonanku, o, Tumpu; Belento na anu talalo ku taha'imani sampe toka sidu-sidutu' molingkudui iwi-iwi' apaa na anu daagi' hi belengku.

²⁷ Mian anu mompala'i Belento mohumpak kasilaka'an, nu silakai nu Belento na mian anu madi' tulu-tulutan hi Belento.

²⁸ Panyo de belengku na totu-totu'u ahi' ma'ima' hondo na jojoong koko hi Tumpu. Tumpu na ku bau tampat pihohunganku da aku moko ala mombebakon iwi-iwi' apaa na anu binau-Nyomo.