MAZMUR 72 - KITAB NU TUMPU ALLA LELE MA'IMAI'

Bau pondo'akon tomundo

¹ Do'a i Salomo. O, Tumpu, pogulu'akon mae na atulan nu Belento hi tomundo, bee'iakon ka'adilan nu Belento hi anak mo'ane nu tomundo.

² O'amalakon da ia momputusi apa-apaa hi mian anu palesayamo hi Belento obatuki hondo-hondo na atulan, ka' mompokona kaputusan opo adin ahi', hi mian anu sinakisamo.

³ De timbali da lipu' mami mohumpakmo ka'ima'an ka' kantumuu'an anu sanang, ka' daagi' ko ka'adilan hi songko-songko na bansa.

⁴ O'amalakon da i tomundo' montinjohi hak nu mian anu nu palentah, montulungi to mia-mian anu kasiasi ka' mompatei anu lewa' monsakisa aha.

⁵ O'amalakon da ia tataap mompalentah sidu-sidutu' nupolundu-lunduakon i tulunan sa'angu' toka i tulunan sa'angu' sapinnyo daagi' ko batu nu sinaa ka' daagi' ko bitu'on.

⁶ O'amalakon da ia sumomo ujan anu tudun i padang anu mateges, sumomo ujan daka' anu nongueeimo iwi-iwi na ale'.

⁷ O'amalakon da ka'adilan sabole-boleh obau kopinnyo ia mompalentah, ka' kasanangan nu kantumuu'an boli kokakulangannyo kopinnyo daagi' ko bitu'on.

⁸ Kalaja'annyo mompaka pintuangmo lengkat mae i ambai santoanyo toka-toka i ambai santoanyo mule', ko ewanyo lengkat mae i sasu kabete'an toka-toka i sasu kinsoban.

⁹ Mian anu monjojoongi i padang tampat anu mateges matundu'mo hi ia ka' anu monsampobali ia tolodadupumo i ahop nu tengkenyo.

¹⁰ To tomu-tomundo' nu aha Tarsis ka' iwi-iwi' na togong momboamo hi ia palasombahan. To tomu-tomundo' nu aha Arab ka' Etiopia tokamo momboa mae pombayan hasin.

¹¹ Iwi-iwi' na to tomu-tomundo' tolodadupumo i ahopnyo, iwi-iwi' na bansa baumo posaihonnyo.

¹² Kalana ia nompobebasmo anu lewa' osakisa anu madi'mo, moko ala mombau apa-apaa, ka' mian anu kinasiasimo anu nomoitamo tulung hi ia.

¹³ Ia mongkalibosi mian anu kinasiasimo ka' mian anu nu palentah, ka' momposalamatmo kantumuu'an nu mian anu talalomo hondo kinasiasi.

¹⁴ Ia mompobebasmo aha da madi'mo lewa' obee'i kasansalan ka' anu saja' opalentah, nusinggi, kalana kantumuu'an nu aha ko angga'nyo hondo hi ia.

¹⁵ Higahiakon na i tomundo salaku mian daka'! O'amalakon da nusombahkon mae nu aha Arab hi ia na mosoni'. O'amalakon da ia saja' odo'akon sansina-sinaa ka' mule' saja' mohumpak balakat.

¹⁶ O'amalakon da gandum saja' sida hondo ka' madi' kokamingkotannyo i songko-songko na lipu', ka' iwi-iwi' na puge'nyo kahomo anu mingguna na hasinnyo. O'amalakon da tano'nyo ma'omuk susumo Bungkutnyo nu Libanon, ka' anu monjojoongi kota'nyo ko pintu-pintuangnyomo sumomo hemput i tampat padang anu ewa.

¹⁷ O'amalakon da sanggo i tomundo saja' o inau' sampe toka sidu-sidutu', ka' mompaka togilele na sanggonyo kopinnyo daagi' ko batu nu sinaa. O'amalakon da tobansa-bansa mongkakase hi Tumpu da obalakati susumo ia, ka' iwi-iwi' na mian montaloakonmo ia, tukoonyo nu aha ia nohumpakmo ka'ima'an.

¹⁸ Opuji' na Tumpu, Tumpu nu aha Israel! Ola Ia na timbali mombau han anu okabangangi.

¹⁹ Opuji' na sanggo-Nyo anu talasanggo sampe toka sidu-sidutu'; o'amalakon da songko-songko na dunia mobuke nu anu mompotalasanggo Ia! Jadimo mae sumo uuka, Amin!

²⁰ Sumo uuka na do'a i Daud, anak i Isai.