MAZMUR 71 - KITAB NU TUMPU ALLA LELE MA'IMAI'

Do'a nu mian anu langkai'mo hondo ka' binengkele'mo hondo

¹ Hi Belentomo na bau pihohunganku, o Tumpu, boli opojohok na aku opopo'ambang.

² Pobebasmo mae na aku, kalana Belento adin, potombihingakon mae na aku ka' posalamatakon mae na aku.

³ Potimbalimo mae susumo bungkutnyo nu batu na belento da bau pihohunganku, anu dengke, na saja' ku poko ala ku sahak. Kalana Belento nontantukanmo momposalamat aku, Belentomo na bau pihohunganku ka' pingkonganku.

⁴ O, Tumpu-ngku potumuu'akon mae na aku da madi' nusilakai nu mian anu ma'idek na kinonyoanyo, i kuasa nu to mia-mian anu uesan ka' buhingison.

⁵ Kalana Belentomo na anu ku taha'imani o, Tumpu, o, Tumpu, aku pinalesayamo hi Belento salatanmo pe'e aku daagi' olitau.

⁶ Sumo uukamo na kinopinno na aku tinumuu', aku ola saja' maninseha hi Belento; Belento nonjagaimo mae aku salatanmo pe'e aku i hampe, sahingga aku saja' mompuji' Belento.

⁷ Kantumuu'anku baumo sonto hi mian da'isan, kalana Belentomo na anu mahoson monjagai mae aku.

⁸ Aku saja'mo, mompuji' Belento, sansina-sinaa ku bebakon na katalasanggoan nu Belento.

⁹ Boli ola aku nu'alin nu Belento de aku langkai'mo kabai Bengkele'mo, boli opala'i na aku de aku madi'mo mahoson,

¹⁰ kalana iwi-iwi' na anu monsampobali' mae aku mombisalakonmo aku, to mia-mian anu kahanda'mo monsilakai mae aku nosa'angu'mo.

¹¹ Koonyo nu aha, “Ia pinala'ianmo nu Tumpu; imbo' da otuloi'to ka' ohakop to na ia, kalana madi'mo ko anu momposalamat ia.”

¹² Boli Belento majo'on aiya hi belengku, o, Tumpu Allah, o, Tumpungku sampamo mae tulungi na aku.

¹³ Bakas da mian anu montumbuhi mae aku opopo'ambangmo ka' osilakaimo. Bakas da mian anu kahanda'mo, monsilakai mae aku, bingongmo ka' mongoa'imo ma'ambang.

¹⁴ Panyo aku na saja' ahi' montaha'imani Belento, ka' lebe saja'mo ahi' mompuji' Belento.

¹⁵ Sansina-sinaa ku sisikakon apa-apaa na palabuatan nu Belento anu adin, ka' kasalamatan anu lengkat mae hi anu madi'-Mo opoko ala obilang.

¹⁶ Ku puji' na palabuatan nu Belento anu daka' hondo o Tumpu Allah, ku bebakon momoya na ka'adilan nu Belento, ola ka'adilan nu Belento.

¹⁷ O Tumpu, Belento nompokinde'imo mae aku salatanmo pe'e ma'isa i langkai' ka' binegkele', sangkut uuka aiya ku sisikakon na kalaja nu Belento anu okabangangi hondo.

¹⁸ O Tumpu, boli opala'i na aku, sangkut aku langkai'mo ka' bengkele'mo ka' uanonmo, da kabaanian ka' kuasa nu Belento ku bebakon, hi iwi-iwi' na tulunan anu aiya mae i ahop.

¹⁹ O Tumpu, ka'adilan nu Belento matangkas hondo sumo langit; daka' hondo na hahan anu binaumo nu Belento; ihe na moko ala mompokakanai Belento?

²⁰ Belento nombee'imo mae aku manjoo' hondo na kasansala'an anu toto boa-boat, panyo Belento po'ule' mae mombee'i aku kahosonan ka' po'ule' mompotumuu' aku anu i lamunmo.

²¹ Belento po'ule'mo mompotimbali aku da lebe oholomati, ka' po'ule' mule' momposanang kinyonyoangku.

²² Aku mompuji'mo Belento okuti'akon gambuus, kalana Belento manonong, o, Tumpungku. Aku monyanyiakonmo anu bau pompuji' Belento okuti'akon kasapi', o, Tumpu susi' na Israel.

²³ Aku nontaligalai kalana sinanangmo hondo na kinyonyoa, ka' nonyanyiakonmo bau pompuji' Belento. Santuu'ku ka' butongku manyanyi lame'mo hondo, kalana Belento nomposalamatmo mae aku.

²⁴ Sansina-sinaa ku bebakon na ka'adilan nu Belento, kalana to mia-mian anu kahanda'mo monsilakai mae aku pinatundu'moka' pinopo'ambangmo.