MAZMUR 69 - KITAB NU TUMPU ALLA LELE MA'IMAI'

Do'a kalana sinakisamo

¹ Anu mongkapali panyanyi. Ingala ilagu nu nyanyian Bunga Bakung. Nyanyian i Daud.

² Posalamatakon mae na aku, o, Tumpu, kalana uee noliba'mo tinoka-tokamo i gogohongku.

³ Aku tinopolosmo i tampalang anu maleeng hondo, madi'mo kinopanimpeja'an. Aku tinonu'mo i uee anu maleeng hondo, inganjuhakonmo nu ambai anu binundokmo.

⁴ Aku lewa'mo nomoita tulung sahingga aku nalawemo ka' mule' gogohongku pinakamo hondo. Matangku naposmo hondo na lewa' montanda'i Tumpungku pa' hipian mae na montulungi aku.

⁵ Mian anu mongka'ideki mae aku padahan madi' ko saba-sababnyo, lebe manjoo' nu lingkudui na hambahan nu ubaku. Mian anu toto hoso-hoson kahanda'mo mae monsilakai aku; aha molambanimo mae aku ka' lewa'mo mompobau-bau anu madi' totu'u. Aku pinakisamo nu aha da osule'akon na, halata' anu madi' ola ingagoanku.

⁶ O, Tumpu nu sumbu' nu Belento na kasala'anku iwi-iwi' dosa'ku madi' tompo suluk hi Belento.

⁷ Boli opojohok na aku dumo ola monsaduakon ma ambang na to mia-mian anu montaha'imani Belento, o, Tumpu, Tumpu Anu Daka na Kuasa-Nyo. Boli opojohok na aku dumo monsaduakon ola lewa' o alu ka' mule' opobau-bau na to mia-mian anu monsombah Belento, o, Tumpu Israel!

⁸ Kalana Belento sahingga aku pinopo'ambangmo kalana Belento sahingga aku lewa'mo ingalu.

⁹ Aku sumomo mian anu isalipu'anmo, misa'mo sumo utus nu to utu-utusku, sumomo mian anu isambiha'nyomo, misa'mo sumo to utu-utusku anu tu'a, tiba utusku anu ise'nyo.

¹⁰ Tahahumo hondo na aku monginde'i Laigan nu Belento kalana ku ka'ima'i, mian mongkokojoi, mompopo'ambang Belento suele aiya kinonamo mae hi butongku.

¹¹ Aku ihumangmo ka' binapuasa'mo panyo aha mongalu mae aku.

¹² Aku nompusokmo kalung salaku tanda ko anumo sinilaka, panyo aha moletakon aku.

¹³ Aku tinimbalimo mian anu lewa' osisik iyaya mae de sihukmo na mian, ka' mule' nyanyian nu to mia-mian anu lewa' malangu mongaku aku.

¹⁴ Panyo aku binalado'amo hi Belento o, Tumpu, o, Tumpu taami mae na aku i sa'angu' na tempo anu ma'ima'. Tulungi mae na aku kalana kalibosan nu Belento anu daka' hondo, ka' kalana kanonongan nu Belento.

¹⁵ Boli opojohok na aku molomos i uno nu tampalang, posalamatakon mae na aku da madi nu silakai nu to mia-mian anu nongka'idekimo mae aku, ka' da madi' nu kotusi nuuee anu maleeng hondo.

¹⁶ Boli opojohok na aku nu anjuhakon nu ambai anu bundokmo ka' bokolonmo ka' mule' tonu'mo ilana nu ambai kabai olamunmo i uno nu bolo'.

¹⁷ Taami mae na aku o, Tumpu kalana Belento manonong ka' sabole-boleh mongkalibosi mae. Sanang pe'e mae na kinyonyoa monsiloi aku kalana tahahumo hondo na pongkalibosi mae nu Belento.

¹⁸ Boli maninsuluk dumo aku posaihon nu Belento aiya madi'mo montoa, kalana aku tinokanmo nu kasusa'an, sampamo mae tulungi na aku.

¹⁹ Tokamo mae posalamatakon na aku, pobebasmo mae na aku da madi'mo nu silakai nu mian anu monsampobali' mae aku.

²⁰ Sinumbu'mo nu Belento na aku, iletakonmo, ingalumo, ka' pinobau-baumo tinoamo nu Belento iwi-iwi' na mian anu monsampobali' mae aku.

²¹ Alu nu mian nonsaduakonmo da aku ihentemo na kinyonyoangku, ka' madi'mo kino pikilan pa' apaa na obau. Iliongku na anu mongkalibosi mae panyo ola pinalasuma iliongku na anu momposanang kinyonyoa panyo madi' ahi' ihumpakku.

²² Pakalaus mule' aku pinokanaannyomo mae nu aha lasung; salatan inegotmo aku binee'annyomo mae suka da o'inum.

²³ Bakas da aha mongkaan ola da monsaduakon silaka, ka' timbalimo sabab hi aha to mia-mian anu ilagamo nu aha mongkaan da silakamo.

²⁴ Bakas da mata nu aha mapisokmo ka' tundun nu aha madi'mo ko kahosonannyo.

²⁵ Potudunmo hi aha na tambuha' nu Belento, bakas da aha nukonamo nu tambuha' nu Belento anu kinojuhu-juhutmo.

²⁶ Bakas da bakema'an nu aha liingmo hondo-hondo, da iwi-iwi' na kema' nu aha madi'mo ko anu monjojoongi.

²⁷ Kalana aha nosakisamo mian anu ihukumo nu Belento, ka' lewa'mo nombisalakon to mia-mian anu sinakisamo nu Belento.

²⁸ Bakas da kasala'an nu aha mompaka pintuangmo boli mompototu'u aha.

²⁹ Bakas da sanggo nu aha bolimo opotulis i uno nu kitab popontulisan mian anu tumuu'; ka' madi'mo otulis i uno nu daputan popontulisan mian anu hodi' na kinyonyoanyo.

³⁰ Panyo aku sinakisamo ka' nongoa'imo lanit, hangkatmo mae na aku o, tumpu ka' posalamatmo mae na aku.

³¹ Sahingga aku mompuji'mo Tumpu nu nyanyian, mompopodaka'mo Ia nu nyanyian anu bau pontalimakaseh.

³² Aijo'mo na lebe nu situjui nu Tumpu nu lingkudui na sapi' anu okolobanakon koloban sapi' lakinyo anu daka'.

³³ Montoa han aijo' mian anu sinakisamo lame'mo, mian anu monsombah Tumpu bilahimo.

³⁴ Kalana Tumpu nohongomo mian anu kasiasi; Ia madi' mompojohok mian anu palesayamo hi Ia kiijo' i uno nu talungku'.

³⁵ Puji' na Tumpu o, langit tiba tano', ndalangon tiba iwi-iwi' na anu konyawanyo anu kiijo' i unonyo.

³⁶ Ia momposalamatmo Yerusalem ka' po ule'mo mombau iwi-iwi' na kota' i da'erah Yehuda. Mian anu palesayamo hi Tumpu jojoongmo kiijo' mae, tano' aijo' ahamo na tumpunyo.

³⁷ To maku-makumpu nu aha aijo'mo na montumpui sampe molapi-lapis na lee' nu aha, to mia-mian anu mongka'ima'i Tumpu aijo'mo na saidi' mae monjojoongi.