MAZMUR 68 - KITAB NU TUMPU ALLA LELE MA'IMAI'

Nyanyian kalana inguntungmo na nahampate

¹ Anu mongkapalai panyanyi. Mazmur i Daud.

² Tumpu nomposungkehetmo ka' nongga'a-ga'atmo anu nonsampobali' Ia, mian anu mongka'ideki Ia nopalaimo madi'mo noko ala tinuminjo i ahop-Nyo.

³ Tumpu nolaa'mo aha, sumomo tibuk pinuhakonmo nu mombun ka' madi'mo tinoatoa. Sumomo tahu' i noe'mo kalana napanasmo nu apu sumomo aitu na mian anu ma'idek na kinyonyoanyo madi'mo otoa-toa i ahop nu Tumpu.

⁴ Panyo mian anu palesayamo totu-totu'u na bilahimo ahi' ka' lame'mo, aha lewa'mo montaligalai i ahop nu Tumpu kalana sinanangmo.

⁵ Ponyanyimo, bau pompuji' sanggo nu Tumpu, potoukamo na jalan daka' da bau kajalanan-Nyo mae anu nonsake'i mae kundom. Sanggo-Nyo Tumpu – balasana-sanangmo i ahop-Nyo!

⁶ Tumpu anu jojoong i Laigan-Nyo anu susi' tuuma nu anak anu inguanonmo madi'mo ko tuumanyo ka' tinanyo, ka' anu saja' mompalahatikan to mia-mian binalumo.

⁷ Tumpu mombee'i tampat kajojoongan nu mian anu madi' mo lame'; Ia nompobebasmo mian anu tinalungku'mo sahingga aha nongoa'imo kasanangan. Panyo to mia-mian anu madi' mohongo-hongo Tumpu na jojoongmo ahi' i tano' anu kinunmo.

⁸ O, Tumpu tempo'nyo Belento nolaya' mian anu palesayamo hi Belento i lumajang notulu i tampat anu madi' ko ueenyo,

⁹ dunia ginayu'anmo, ujan tinombulokmo i ahop nu Belento, kalana Tumpu anu kiita' i Sinai, Tumpu Israel tinokamo mae.

¹⁰ Ujan nolabi-labimo na tinudunakon mae nu Belento, ka' po'ule'mo nompa'omuk tano' nu Belento anu kinunmo.

¹¹ Lantas mian anu palesayamo hi Belento jinojoongmo i kiijo' mae; kalana kanonongan nu Belento, o, Tumpu Belento nompotuu' mo mian anu kasiasi.

¹² Tumpu nompalentahmo, lantas to boboune nompolelemo:

^13-14 “To tomu-tomundo ka' suludadunyo nopalaimo!” Aha sumomo malapatii' anu i lumahapmo ka' nambamo. To boboune i laigan nombagi-bagiakonmo, salaka ka' mosoni' anu pinala'ianmo. Maumo ahi manjoo' na anu madi' namba nahampate, mian anu palesayamo hi Tumpu nohumpakmo mae ka'untungan na nahampate.

¹⁵ Salatan Aku Daka' na Kuasanyo nombee'mo to tomu-tomundo anu kiijo' mae, tinudunmo mae na eis lengkat mae aita' i Bungkutnyo nu Salmon.

¹⁶ Bungkutnyo nu Basyan aijo'mo na bungkutnyo anu talasanggo hondo, bungkutnyo anu nobagi-bagi manjoo' na bungkutnyo toto ise-ise'.

¹⁷ Kadaka' atina' mae ibungkutnyo manjo-manjo atina' beleyum minsihipmo na montoa mae Puge'nyo nu Sion anu pinile'anmo nu Tumpu bau kajojoongan-Nyo? Tumpu jojoongmo kiijo' mae sampe toka sidu-sidutu'.

¹⁸ Pulu'an nu madala na kareta anu otaha'imano; Tumpu tinokamo hi aha, Ia nompotoamo katalasanggoan-Nyo.

¹⁹ Tumpu noliba'mo nokiita' i tampat anu matangkas; manjoo' na anu i hakopmo binoa-Nyomo Ia nontalimamo palasombahan lengkat mae hi manusia ka' mule' lengkat mae hi aha sa'anakan anu lewa' mombau kahengge'an; da aha jojoong hingga-hinggat tiba Tumpu.

²⁰ Opuji' na Tumpu, kalana Iamo na Tumpu anu momposalamat kita; sansina-toka sansinaa n simbu na kolononto.

²¹ Tumpu-nto aijo'mo na Tumpu anu momposalamat, Ia na mompobebasmo kita da madi' sinilaka.

²² Tumpu na tionyo ahi' mompohimpuyu ubak nu anu monsampobali' Ia, to mia-mian anu me saja' tumuu' mombau dosa'.

²³ Tumpu notatae, “O mian anu palesayamo hi beleng-Ku, Ku boamo na sampobali' nu belemiu lengkat mae i Basyan Ku sule'akonmo na aha lengkat mae i lananyo nu ndalangon,

²⁴ da baso' nu aha baumo pombaso'i nu belemiu tengke nu belemiu ka' nujila'ije nu dedeng nu belemiu iwi-iwi' sampe ma'osamo hondo.”

²⁵ Iwi-iwi' montoamo Belento balondamo ka' binilahimo, o, Tumpu kalana inguntungmo na nahampate, Tumpu-ngku, Tomundo'ku, tinuntunanmo ka' binilahimo na to mia-mian namba i tampat kajojoongan-Nyo.

²⁶ Aita' momona anu i lumajang to mia-mian anu manyanyi, akaong mae i mihi-mihinyo to mia-mian anu mongkuti' kasapi'; i totonga'nyo to lalangkoyang anu mohapa'i gandang; sumo uuka na nyanyian nu aha:

²⁷ “O, puji' na Tumpu hau-hau-Nyo mian anu palesayamo hi ia sihukmo, opuji' na Tumpu, o, belemiu iwi-iwi' na lee' i Yakub!”

²⁸ Benyamin tulunan mae nu bansa anu sangkiding hondo na miannyo ia ilumajang namba momona, lantas tinuntunanmo nu to pola-polaya' nu aha Yehuda, ka' aitu mae montuntuni to pola-polaya' nu aha Zebulon tiba Naftali.

²⁹ Tumpu nu belemiu montuntut kahosonan nu belemiu; o, Tumpu potatapmo mae hi kami apaa na anu binaumo nu Belento hi kami.

³⁰ To tomu-tomundo' momboamo palasombahan hi Belento, kiijo' i Laigan nu Belento i Yerusalem.

³¹ O, segai na Mesir, binatang anu mahangas aijo' i uno nu biho'. Pokinde'i na to bansa-bansa, sapi' sanggombu haha aijo' tiba to ana-anaknyo, anu ola lewa' mompahampeja'akon sa'angu' ka' sa'angu' da mohumpak salaka. Tumpu nomposung kehetmo ka' nongga'at-ga'atmo iwi-iwi' na bansa anu mongka'ima'i mahampate.

³² To mia-mian daka' nu aha Mesir nomboamo mae tambaga; mian nu aha Sudan kinosia-sia'mo mae nomboa mae hasin hi Tumpu.

³³ Panyanyimo sombahkon hi Tumpu, o, iwi-iwi' na kalaja'an, o, nyanyi na bau pompuji'-puji' Tumpu,

³⁴ bau pompuji' ia anu nontuluimo mae aita' langa anu salatanmo pe'e dunia aiya. Potombihing! Tumpu notataemo, potatae-Nyo pinoli-polintupmo okabuhuk hondo.

³⁵ Akuimo na kakuasa'an nu Tumpu anu mongkuasai aha bansa Israel, kuasa-Nyo toka-toka kiita' mae i langit.

³⁶ Totu-totu'u mompobangang ahi' na Tumpunto salatan Ia nosabatmo mae lengkat it ampat kinajojoongan-Nyo. Tumpu nu aha bansa Israel nombee'imo kuasa ka' kahosonan hi mian anu palesayamo hi Ia. Talalo opuji' na Tumpu!