MAZMUR 65 - KITAB NU TUMPU ALLA LELE MA'IMAI'

Mompuji' ka' montalima kaseh

¹ Anu mongkapalai panyanyi. Mazmur i Daud. Nyanyian.

² Konanyomo na kami mompuji' Belento, anu kiita' i Sion, o, Tumpu, ka' mongganapimo janji' mami hi Belento.

³ Kalana Belento na mombee' mae anu kinakasemo mami i uno nu do'a; iwi-iwi' na mian tinokamo mae hi Belento kalana binaladosa'mo.

⁴ Dosa'ku iwi-iwi' naboatmo hondo hi belengku, panyo ingampunanmo nu Belento.

⁵ Mohumpakmo ka'ima'an na kantumuu'an nu mian anu pinile'anmo nu Belento ka' anu ilagamo nu Belento da jojoongmo i laigan nu Belento. Kami nu osaimo nu anu toto ima-ima' iwi-iwi' i Laigan nu Belento, kajo-kajojoongan nu Belento anu susi'.

⁶ Belento nontaamimo mae kami ka' nombee'imo mae kami da inguntungmo na nahampate, binaumo nu Belento na hahan anu okabangangi kahanda' momposalamat kami. Belento na kataha'imanan nu bansa iwi-iwi' toka-toka i ndalangon anu najo'onmo.

⁷ Kalana kahosonan nu Belento, pinotinjomo nu Belento, na to bungku-bungkutnyo bau pompotoa kakuasa'an nu Belento anu moko ala hondo mombau apa-apaa.

⁸ Pinobelentimo nu belento na buhok nu ndalangon ka' bokon anu taha-tahahumo hondo, ka' pinobelentimo nu Belento na bansa iwi-iwi' anu saja' mombau kahengge'an.

⁹ Iwi-iwi' na anu jojoong i dunia aiya nabuhukmo ka' no holomatimo kalana nontoamo apa-apaa na anu binaumo nu Belento anu madi' hondo kogampanyo. Songko-songko na dunia lengkat mae i puusnyo sa'angu' toka-toka i puusnyo sa'angu', pinolame'mo nu Belento ka' lewa'mo nontaligalai.

¹⁰ Tano' aitu Belento na mongkalesang ka' Belento na nombee'i mae ujan, pinotimbalimo nu Belento da na'omuk sahingga hasinnyo manjoo' hondo. Iwi-iwi' na kaunyo pinobuke'an nu Belento nu uee, tinoukanmo nu Belento gandum na aha, ya, sumo aijo'mo na Belento nompotoukai.

¹¹ Belento nompojalanimo uee i kinatuluan nu pajekonyo, ka' i humpisan-Nyomo na tano' anu ma'isa nohibu. Belento nongujanimo mae sahingga tano' madi'mo bineleng, ka' sosu'anon anu sala'je mae tumuu' pinolumba'akonmo nu Belento na tinumuu'.

¹² Kalana Belento nongkanonongimo mae, sataun toka sataun nuposadiakonmo nu Belento na bua'nyo nu sosu'anon anu ohumpak mami iya na anu katokaan nu Belento, i kiijo' na anu ohumpak manjoo'.

¹³ Tampat anu mateges nanjoo'mo na mee'nyo tiba dombanyo, iwi-iwi' na puge'nyo lame'mo.

¹⁴ Iwi-iwi na tampat anu manjoo na hemputnyo sinalintutubanmo nu domba, to bangka-bangka'nyo kahomo gandum. Iwi-iwi' nontaligalaimo ka' nanyanyimo ka' i lame'mo.