MAZMUR 64 - KITAB NU TUMPU ALLA LELE MA'IMAI'

Do'a mongkakase da ojagai mae

¹ Anu mongkapalai panyanyi. Mazmur i Daud.

² O, Tumpu potombihingakon mae na do'angku de aku susa'mo, posalamatakon mae na nyawangku da boli nusilakai mae nu anu monsampobali' mae ka' anu saja' mompobuhuk mae.

³ Jagaiakon mae na aku da boli nusilakai mae nu anu lewa' basangaja' mombau anu palaganta, ka' mule' tanga'an nu to mia-mian anu pande hondo na mongakali ka' saja' mombau anu ma'idek.

⁴ Nu potimbalimo na jila' nu aha matajom susumo bajak, ka' montaeakonmo potatae nu aha anu laloasa hondo susumo pana'.

⁵ I tampat paninsulukan nu aha, nubebakonmo mae nu aha na sisi-sisik anu madi' totu'u, aha madi' mabuhuk na lewa' mompobau-bau mian anu madi' ko sala'nyo.

⁶ Aha jinunjuhi'mo i tanga'an nu aha anu ma'idek hondo, ka' basale'mo da mompokonamo so'o; koonyo nu aha madi' koanu montoa.

⁷ Aha montanga'imo mombau anu ma'idek, ka' montaloakonmo, “Kami batanga'mo mombau kapandean anu mongakali.” Kinyonyoa ka' pikilan nu aha manusia, maleeng hondo madi' opoko luntok.

⁸ Panyo nupana'akonmo nu Tumpu na pana'-Nyo mokiijo' hi aha, ka' monti-montiik ahi' aha belaonmo.

⁹ Aha silakamo kalana potatae nu aha na monsaduakon; iwi-iwi' na anu montoa kino bilok-bilokmo.

¹⁰ Lantas iwi-iwi' na mian mabuhukmo; aha mompotutugakonmo apaa na anu binaumo nu Tumpu ka' mombebakonmo apaa na anu binau-Nyomo.

¹¹ Sahingga iwi-iwi' na mian anu ma'ima' na kinyonyoanyo lame'mo, kalana nontoamo apaa na anu kinalaja'nyomo nu Tumpu. Aha mihohungmo hi Ia; iwi-iwi' na mian anu hodi' na kinyonyoanyo binilahimo.