MAZMUR 63 - KITAB NU TUMPU ALLA LELE MA'IMAI'

Mongindi mamba hi Tumpu

¹ Mazmur i Daud, tempo'nyo ia kiijo' mae i tampat anu mateges hondo i tano' Yehuda.

² O Tumpu, belentomo na Tumpungku, ku lio ka' ku indi mamba hi Belento. Sumomo tano' anu kinunmo i negotmo nu uwe sumomo aijo' na aku i negotmo hi Belento.

³ Da aku montoa Belento i laigan nu Belento, ka' montoa kahosonan ka' katalasanggoan nu Belento.

⁴ Kalibosan nu Belento lebe ko angga'nyo molingkudui kantumuu'an, kalana aijo' aku mompuji'mo Belento.

⁵ Sansina-sinaa i uno nu kantumuu'anku, aku montalima kaseh hi Belento; ku hangkat na limangku mokiita' hi Belento ka' balado'a.

⁶ Ku puji' na Belento nu montaligalai ka' lame'mo, kalana Belento nomposanangmo santuu'ku sumomo nongkaan kaanon anu ma'ima' hondo.

⁷ Tempo'nyo ko mamale' i kahoyotan, ku inau' na Belento, sampahu-pahu aku saja' mompotutugakon Belento;

⁸ Kalana Belento na nontulungimo mae aku; i uno nu polipik nu Belento, aku nanyanyimo ka' i lame'mo.

⁹ Ku toongi na Belento dodo-dodo, lima nu Belento na nonsakanmo mae aku.

¹⁰ Panyo to mia-mian anu mongkahanda'imo monsilakai mae aku mintatau'mo mokaiyong i dunia nu mian anu sinilakamo.

¹¹ Aha silakamo i uno nu pahampatean, ka' timbalimo kaanon nu binatang anu mahangas.

¹² O tomundo' lame'mo kalana Tumpu nontulungimo; mian anu basumpa' hi sanggo nu Tumpu na bilahimo ahi', panyo nganga' nu mian anu baleko' na o'onsongimo ahi'.