MAZMUR 62 - KITAB NU TUMPU ALLA LELE MA'IMAI'

Tumpu na timbali opalesaya monjagai mae

¹ Anu mongkapalai panyanyi. Ingala i lagu: Yedutun. Mazmur i Daud.

² Santuu'ku madi'mo mabuhuk kalana montanda'imo Tumpu, olamo samata-mata lengkat mae hi ia na kasalamatanku.

³ Olamo Ia samata-mata na monjagai mae aku, ka' momposalamat aku, Ia na montinjohi mae aku, aku madi'mo opoko ala opoposia.

⁴ Sampe toka hipian na belemiu iwi-iwi' montumbuhi anu ola samian anu memo susumo pimpi' anu tinagelemo ka' susumo pagan mesen anu malia'mo motua'?

⁵ Belemiu ola batanga' monabu'akon ia da madi'mo talasanggo na sanggonyo. Belemiu mongka'ima'imo baleko'; nganga' nu belemiu montaloakon mombalakati, panyo i uno nu kinyonyoa nu belemiu montotobi'akon.

⁶ Santuu'ku madi'mo mabuhuk kalana montanda'imo Tumpu, olamo samata-mata lengkat mae hi ia na kasalamatanku.

⁷ Olamo Ia samata-mata na monjagai mae aku ka' momposalamat aku; Ia na montinjohi mae aku, aku madi'mo opoko ala opoposia.

⁸ Iamo na Tumpu anu mombee'imo mae aku kasalamatan ka' kaholomatan, Iamo na anu nonjagai mae aku ka' anu nontinjohimo mae aku anu otaha'imani.

⁹ O, bansaku, sabole-boleh Tumpu na bau kataha'imanan sansina-sinaa; bee'mo iwi-iwi' naisi nu kinyonyoa nu belemiu hi Ia, kalana olamo hi Ia na tampat pihohungan.

¹⁰ Manusia ola susumo monguusakon napas, tu'anyomo kabai daagi' anak bubuu' madi' ko angga'nyo. De otimbang, aha laing hondo, nulingkudui na kolaingnyo nu napas anu ouusakon.

¹¹ Boli montaha'imani anu ola o humpak kalana opakisa hi mian, ka' boli montakabunakon balang anu opahuhuakon. Ka' mule' de kakaya'an nu belemiu mompaka pintuangmo, boli kinyonyoa nu belemiu me saja' kiijo' i halata'.

¹² Pa' piniangkukamo na aku nohongomo Tumpu notatae, tukoonyo, kakuasa'an nolengkat mae hi Ia,

¹³ ka' tukoonyo Ia tataap mongkalibosi. Belento, o, Tumpu, na mombalosakon kasala'an nu batu-batu mian sapadan i kasala'an anu binaunyomo.