MAZMUR 60 - KITAB NU TUMPU ALLA LELE MA'IMAI'

Do'a mongkakase da otulungi mae

¹ Anu mongkapalai panyanyi. Ingala i lagu nu nyanyian: Bunga bakung na bau sakisi. Mazmur bau pangajalan lengkat hi Daud,

² tempo'nyo ia nahampate tiba mian nu Aram-Mesopotamia ka' mian nu Aram-Zoba, ka' tempo'nyo i Yoab ninsusule'mo mae, ka' nompatundu'mo 12.000 na mian nu Edom i Bangka'nyo nu Asin.

³ Belento madi'mo mae nongkalinga kami o Tumpu, ka' ka' nompojohokmo mae kami da opatundu'mo. Belento nontambuha'imo mae kami; uuka aiya po'ule' pokopinahon mae nakami.

⁴ Belento nonggayu'mo tano' sahingga noleetmo; poko'ima'i akon na anu singkapmo nobiha-biha', kalana tano' ginayu'anmo.

⁵ Belento nompojohokmo mian anu palesayamo hi belento sahingga nonta'upmo kasansala'an anu maboat hondo; kami nahasulonanmo susumo mian anu nalangumo.

⁶ Belento nompokinde'imo to mia-miananu tulu-tulutan, da aha madi' nukona nu hukuman.

⁷ Posalamatakon mae na kami nu kuasa nu Belento, taamiakon mae na do'a mami, da to mia-mian anu nukalibosi nu Belento oposalamat.

⁸ Lengkat mae kiita' i kajojoongan-Nyo anu susi' hondo Tumpu notataemo mae, “Aku montaligalaimo ka' mombagi-bagimo tano' nu aha Sikem; Bangka'nyo nu Sukot Ku buangakonmo onde.

⁹ Gilead ka' Manasye Akumo na tumpunyo, Efraim baumo songko'-Ku anu ko aja'nyo, ka' Yehuda baumo tokon nu kalaja'an-Ku.

¹⁰ Panyo Moab baumo tampat pombaso'ian-Ku tengke; Aku montaligalaimo kalana nompatundu'mo Filistea. Hi aha Edom Ku lumbu'akonmo mokiijo' na sapatung-Ku salaku tanda saba' ia aijo' Akumo na tumpu-Nyo.”

¹¹ Ihe na momboa aku mokiijo' i Edom? Ihe na montaka' aku mokiijo' i kota' anu ko bentengnyo aijo'?

¹² O, Tumpu, pa' madi' na Belento mamba hingga-hinggat tiba kami? Pa' madi' na Belento mamba mahampate tiba suludadu mami?

¹³ Tulungiakon mae na kami mongahopi sampobali' kalana de ola manusia na montulungi madi' ko kaliangannyo.

¹⁴ De tiba Tumpu, kita mahosonmo ka' baanimo, Iamo na mompatundu' anu monsampobali' mae kita.