MAZMUR 6 - KITAB NU TUMPU ALLA LELE MA'IMAI'

Do'a de susa'mo

¹ Anu mongkapalai panyanyi. Okuti'akon kasapi. Lagunyo ingala anu ko uwalu'nyo. Mazmur i Daud.

² O Tumpu, boli mae mondoke aku de Belento motambuha'mo, boli mae mohukum aku de Belento pusamo.

³ Kalibosiakon mae na aku o Tumpu, kalana kahosonanku i ningkotmo, pohosonakon mae na aku kalana aku madi'mo nahoson.

⁴ Kinyonyoangku biningungmo hondo; sangkuka na sinaa na Belento mompala'i aku, o Tumpu?

⁵ Po'ule'mo mae pinsusule', o Tumpu ka' potumuu'akonmo mae na aku, posalamatakonmo mae na aku nu kalibosan nu Belento.

⁶ Kalana de silakamo madi'mo o'inau' na Belento; madi' ko anu mompuji' Belento i dunia nu mian anu sinilakamo.

⁷ Aku talalomo hondo nalawe kalana saja'mo notusa' sampahu-pahu na lolu'ku jumuju mohumpisi kahoyotanku.

⁸ Matangku madi'mo talalo montoa kalana susa' na kinyonyoangku, ka' me opiha-pihau' kalana nusaduakon nu to mia-mian anu mongewa mae aku.

⁹ Lambamo, na belemiu to mia-mian anu ma'idek na kinyonyoanyo, kalana Tumpu nohongomo mae aku i humang.

¹⁰ Tumpu nompotombihingmo mae aku nongkakase ka' tinalima-Nyomo na do'angku.

¹¹ Iwi-iwi' na anu monsampobali' mae aku tinolokengkengmo ka' ma'ambangmo ka' tinolosule'mo lia-lia' kalana i legesmo.