MAZMUR 58 - KITAB NU TUMPU ALLA LELE MA'IMAI'

Do'a mongkakase da obalosakon na palabuatan nu mian anu ma'idek na kinyonyoanyo

¹ Anu mongkapalai panyanyi. Ingala i lagu nu nyanyian: Boli mompatei. Mazmur i Daud.

² O, to mia-mian anu balakuasa pa' adin ahi' na kaputusan nu belemiu? Pa' hodi' ahi' na kinyonyoa nu belemiu de belemiu momputusimo palakala nu manusia?

³ I madi', belemiu ola mule' ahi' nombaumo tanga'an anu ma'idek ilipu' aiya, ka' mompakisa mian i lipu' aiya.

⁴ Mian anu ma'idek na kinyonyoanyo madi'mo tinalakana' salatanmo pe'e mae i kompong nu tinanyo aha nongakalimo salatanmo pe'e i hampe.

⁵ Aha ko lasungnyo susumo ulo anu ko bisa'nyo, ka' nongonsongimo bihingnyo sumomo kobra anu mabongon

⁶ anu madi' mohongo potatae nu polatinyo anu pande, kabai potatae nu sando anu pande na mompakuli'i.

⁷ O, Tumpu, pato'i iwi-iwi' na bese' nu aha, gautakon na sae nu singa haha aijo' anu daagi' bata'nyo, o, Tumpu.

⁸ Bakas da aha mohopu'mo, susumo uee anu motismo, susumo hihis nu pana' anu madi'mo natajom.

⁹ Bakas da aha sumomo see' anu tinontanyekmo tinimbalimo ilu, susumo bungamea' anu sinilakamo ma'isa pe'e nontoa jingka.

¹⁰ Ma'isa pe'e aha nombabali'i kalakuan nu aha, aha sinilakamo, susumo tonggomut anu ma'isa motu'a ka' ma'isa daka' ningkotmo i lahabakon nu mombun, sumomo sosu'anon anu nanggasmo.

¹¹ Montoa mian anu ma'idek na kinyonyoanyo i hukumo, mian anu hodi' na kinyonyoanyo i lame'mo, ka' mombaso'imo tengkenyo i baso' nu mian anu palaganta.

¹² Mian tantu motataemo, “Memang mian anu manonong mohumpakmo tambonyo, memang totu'u, ko Tumpu anu momputusi palakala nu dunia aiya.”