MAZMUR 57 - KITAB NU TUMPU ALLA LELE MA'IMAI'

Do'a mongkakase da otulungi mae

¹ Anu mongkapalai panyanyi. Ingala i lagu nu nyanyian: Boli mompatei. Mazmur i Daud, tempo'nyo ia nopalaimo ninsoop i uno nu liang da madi' nukabot i Saul.

² Kalibosiakon mae na aku, o, Tumpu, kalibosiakon mae na aku, kalana olamo hi Belento na pihohunganku. I uno nu polipik nu Belento na bau paninsulukanku, de antong anu daka' hondo madi'mo tobung aku mosabatje.

³ Aku mongkakase momoita tulung hi Tumpu Anu Matangkas na Kuasanyo, hi Tumpu anu timbali mombau apa-apaa hi belengku.

⁴ Kiita' mae i suluga' Ia nontaamimo mae ka' nomposalamatmo aku; Ia nompatundu'mo to mia-mian anu nonsakisamo mae aku. Tumpu je na mompotoa mae taalu' memang Ia monginau' aku, ka' saja' mongkalibosi aku.

⁵ Aku tinikumo nu mian anu monsampobali' mae aku, aha sumomo singa anu mangoa hondo hi manusia. Bese' nu aha sumomo talombo' ka' pana' jila' nu aha sumomo ko tajomnyo nu bajak.

⁶ O, Tumpu, potoa mae na katalasanggoan nu Belento aita' i langit, ka' katalasanggoan nu Belento suele i songko-songko na dunia.

⁷ Anu monsampobali' mae aku nompokonamo so'o, bau ponso'onyo aku, ka' nompopobuhukmo da aku madi'mo moko ala mombau apa-apaa. Aha nongkekemo bolo' i jalan da bau panabu'anku, panyo posi ahamo na nanabu' i unonyo.

⁸ Aku palesayamo totu-totu'u, o, Tumpu, aku palesaya totu-totu'u, aku manyanyimo ka' mompuji'mo Belento.

⁹ O, santuu'ku, pobulaamo! O, pobulaamo, gambus ka' kasapi! Aku mombulaakonmo jingka nu sinaa.

¹⁰ O, Tumpu, aku montalima kasemo hi Belento, aijo' hi aha iwi-iwi' na bansa. Ku ka'ima'i na manyanyi bau pompuji' Belento aijo' hi aha manusia.

¹¹ Kalana kalibosan nu Belento nolabi-labimo, sinundakmo i langit, ka' Belento monginau' mae aku tinoka-tokamo i kundom.

¹² O, Tumpu, potoa mae na katalasanggoan nu Belento aita' i langit, ka' katalasanggoan nu Belento suele i songko-songko na dunia.