MAZMUR 54 - KITAB NU TUMPU ALLA LELE MA'IMAI'

Do'a mongkakase da ojagai mae

¹ Anu mongkapalai panyanyi. Kinuti'akon kasapi'. Nyanyian pangajalan i Daud,

² salatan mian nu aha Sif tinokamo mae nompoto'i hi Saul, “I Daud naninsulukmo hi kami.”

³ O Tumpu posalamatakon mae na aku nu kuasa nu Belento, bee'i mae ka adinan hi belengku ka kahosonan nu Belento.

⁴ Potombihingakon mae na anu ku kakase aiya o Tumpu de timbali sanang mae ahi' na mompalahatikan potataengku.

⁵ Kalana mian anu isalipu'an mae mambamo mae montumbuhi aku, miana anu takabun kahanda'mo mompatei mae aku, aha madi' mompajuli Tumpu.

⁶ Panyo Tumpu atina'mo na anu montulungi mae aku; Tumpu na montinjohi mae aku.

⁷ Ia na mohukumo anu monsampobali' mae aku; nu posi palabuatan nu aha ma'i-ma'idek aijo'mo na mohukum aha, ka' mompatei aha kalana Ia manonong mae ahi' hi belengku.

⁸ Sanang na kinyonyoangku monsombahkon koloban hi Belento, ka' montalima kaseh hi Belento, kalana Belento ma'ima' mae hi belengku o Tumpu.

⁹ Belento nompobebasmo aku da madi'mo mongoa'i iwi-iwi' na kasusa'an, ka' tinoangkumo na sampobali'ku pinatundu'mo.