MAZMUR 53 - KITAB NU TUMPU ALLA LELE MA'IMAI'

Palabuatan ma'idek nu manusia

¹ Anu mongkapalai panyanyi. Ingala ilagu' nu nyanyian: Mahalat. Nyanyian pangajalan i Daud.

² Mian anu ponga' hondo motatae i uno nu kinyonyoanyo, “Madi' ko Tumpu.” Palabuatan nu aha ma'idek ka' okahegati; madi'mo daagi' ko anu nombau palabuatan anu ma'ima'.

³ Kiita' mae isuluga' na Tumpu montoa mae mian, molio mian anu pande monsombah Ia.

⁴ Panyo iwi-iwi' na mian noteba'mo na kinyonyoa nu aha ka' pinalagantamo, madi'mo daagi' ko samiannyo na nombau anu ma'ima'.

⁵ Tumpu notatae, “Madi'mo daagi' sininsumbu' na to mia-mian anu ma'idek haha aijo'? Aha tumuu' ola sola' mongagoi balang nu mian anu palesayamo hi Beleng-Ku, ka' madi' toho' balado'a mae hi Beleng-Ku.”

⁶ Mian anu ma'idek na kinyonyoanyo talalo ahi' mabuhuk, padahan madi' ko anu mompopobuhuk, kalana Tumpu mompotanatamo buku nu mian anu montumbuhimo belemiu; aha madi'mo tinalima nu Tumpu, jadi' opatundu'mo nu belemiu na aha.

⁷ Lengkat mae aita' ipuge'nyo nu Sion tokamo mae, na kasalamatan hi aha Israel. Sahingga lee' mae i Yakub bilahimo, de maluanyo Tumpu po ule'mo mompojadi susumo naipuan mae na kantumuu'an nu mian anu palesayamo hi Ia.