MAZMUR 52 - KITAB NU TUMPU ALLA LELE MA'IMAI'

Hukuman kona hi aha anu ma'idek na kinyonyoanyo

¹ Anu mongkapalai panyanyi. Nyanyian pangajalan i Daud,

² salatan i Doëg, mian nu Edom tinokamo mae nompoto'i hi Saul tukoonyo i Daud tinokamo ilaigan i Abimelekh.

³ O mian anu mahoson, kadaka' beleyum montakabunakonmo palabuatan nu beleyum ma'i-ma'idek, hi mian anu nu kalibosi nu Tumpu?

⁴ Sansina-sinaa beleyum mongakali ka' saja' montanga'i mombau anu ma'idek; jila' nu beleyum sumomo ahi' piso' pongkis ubak anu matajom hondo.

⁵ Sahanyo mongka'ima'i palabuatan ma'idek ka' madi'mo mongka'ima'i palabuatan anu ma'ima', sahanyo baleko' ka' madi'mo montaeakon potatae anu totu'u.

⁶ Tiba potatae nu beleyum atina' beleyum mongakalimo, ka' monsakitimo kinyonyoa nu mian!

⁷ Panyo beleyum nu silakaimo nu Tumpu sampe toka sidu-sidutu'; beleyum ohakopmo ka' ohela'mo lengkat atina' mae ilaigan nu beleyum, ka' o'alinimo da madi'mo jojoong idunia nu mian anu tumuu'.

⁸ Montoa han aijo' mian anu bala'iman hondo jadimo mabuhuk, lantas mongkokojoimo beleyum ka' motataemo,

⁹ “Aijo'mo na mian anu madi' mihohung' hi Tumpu, panyo montaha'imani kakaya'annyo anu nanjoo'mo hondo ka' moliomo kasangan ibalang anu sola' ingagoannyo hi mian.”

¹⁰ Panyo aku na sumomo ahi' kau' zaitum anu molumba' hondo, i uno nu Laigan na Tumpu. Ku palesaya saba' Tumpu Allah na tataap ahi' mongkalibosi mae, sampe toka sidu-sidutu'.

¹¹ Aku saja' mongka'oho' montalima kaseh hi Belento, i ahop nu Belento ku bebakonmo na kanonongan nu Belento.