MAZMUR 51 - KITAB NU TUMPU ALLA LELE MA'IMAI'

Do'a mongkakase da o'ampuni

¹ Anu mongkapalai panyanyi. Mazmur kalangan i Daud

² salatan ia pinokinde'anmo i Nabi Natan kalana nasala'mo tiba i Batsyeba.

³ Kalibosiakon mae na aku o Tumpu, kalana Belento tetap mongkalibosi, hapusakon na dosa'ku kalana kalibosan nu Belento anu daka' hondo.

⁴ Baso'iakon mae na palabuatanku anu ma'idek; pobelesi'akon mae na dosa'ku.

⁵ Kalana ku akuimo na kasala'an-kasala'anku, dosa'ku saja'mo sola' ku inau'.

⁶ Hi Belentomo, hi Belentomo na binaladosa'anku, ka' binaungkumo na anu nu anggap nu Belento ma'idek. Sahingga konanyomo ahi' na Belento mohukumo mae aku, adin memang na kaputusan nu Belento.

⁷ Memang, ma'idek na kinyonyoangku salatanmo pe'e aku pinohampe, ka' binaladosa'mo salatanmo pe'e i uno nu ma'alum.

⁸ Belento montutut kinyonyoa anu hodi'; isi mae na kinyonyoangku nu kapandean lengkat mae hi Belento.

⁹ Posusi'akon mae na aku da aku belesi'mo; baso'i mae na aku, da ku lingkuduimo na kopute'nyo nu kabu-kabu.

¹⁰ Sahanyo aku sola'mo mohongo lele anu lame', da kinyonyoa anu ihansunanmo nu Belento aiya po ule' ahi' montaligalai.

¹¹ Posiloimo na ohup nu Belento ka bolimo mae montoa iwi-iwi na dosa'ku, ka' sautimo iwi-iwi' na kasala'anku.

¹² Pojadiakon mae na kinyonyoangku anu madi' ko galo-galo'nyo o Tumpu, po ule' bau mae da bu'ou na kinyonyoangku ka' ko kasabanan ahi'.

¹³ Boli mongalin aku sahingga majo'onmo i ahop nu Belento, ka' boli mongala roh nu Belento anu susi', anu aiya hi belengku.

¹⁴ Po'ule' mae polame' na aku kalana kasalamatan anu lengkat mae hi Belento bee'i mae na aku kinyonyoa anu mongka'oho tulu-tulutan hi Belento.

¹⁵ Sahingga ku ajanakonmo na palentah nu Belento hi mian anu baladosa', da aha po ule'mo minsusule' hi Belento.

¹⁶ Poluputakon mae na aku da madi' nu ala nu kapatean, o Tumpu anu momposalamat mae aku, sahingga sanang na kinyonyoangku mombebakon ka'adinan nu Belento.

¹⁷ O Tumpu tulungiakon mae na aku motatae, sahingga aku mompuji-puji'mo Belento.

¹⁸ Belento madi' mongka'ima'i koloban anu okolot; de maluanyo aku monsombahkon kiloban anu opotunu, Belento madi' ahi' mongka'ima'i.

¹⁹ Koloban anu osombahkon hi Tumpu te kinyonyoa anu nohintutumo, kinyonyoa anu ta'aluk ka' balatobatmo yo madi' nu sangka anu Belento.

²⁰ O Tumpu potoamo na kanonongan nu Belento hi Sion, po ule'mo bau na pagan mesen nu Yerusalem iwi-iwi'.

²¹ Sahingga Belento sanangmo na montalima koloban anu pantas, koloban anu opotunu tiba koloban anu ti'a-ti'angu', sapi' lakinyo okolobanakonmo i mezbah nu Belento.