MAZMUR 44 - KITAB NU TUMPU ALLA LELE MA'IMAI'

Do'a mongkakase da ojagai mae

¹ Mazmur nu aha sa'anakan i Korah. Nyanyian pangajalan. Anu mongkapalai panyanyi.

² O Tumpu, pinosi hongomo mami sisikon anu sinisikmo nu mompolee' mami mongkona palabuatan anu opalias hondo bibinaumo nu Belento tempo'nyo naipuan mae.

³ Posi Belentomo ahi' na nolaa' to bansa-bansa da mian anu palesayamo hi Belento tataapmo ilipu' nu aha. To bansa-bansa sangga'at sinilakanmo nu Belento panyo mian anu palesayamo hi Belento na pinoloasmo ahi' nu Belento da ko pintu-pintuangnyo.

⁴ Tano' aijo' madi' pino ago nu aha nonggunakon bajak misa' ola posi kahosonan nu butong nu aha sahingga aha inguntungmo na nahampate, panyo kalana kakuasa'an tiba jingka salaku tanda daagi' ko Belento hi aha kalana Belento na sanang ahi' hi mian anu palesayamo hi Belento.

⁵ Belentomo na Tomundo'ku ka' Tumpungku, anu nombee'imo ka untungan nahampate hi mian anu palesayamo hi Belento.

⁶ Tiba kakuasa'an nu Belento kami nompatundu'mo sampobali' mami ka' nompokalamo to mia-mian anu nontumbuhimo mae kami.

⁷ Kalana aku madi' montakabunakon pana'ku maumo ahi' bajaku madi' momposalamat mae aku.

⁸ Panyo Belento na nomposalamatmo mae kami da madi' pinatean nu anu mongewa mae kami. Ka' nompatundu'mo to mia-mian anu mongka'ideki mae kami.

⁹ Sahingga kami saja'mo mompopodaka' Belento ka' saja'mo montalima kaseh hi Belento.

¹⁰ Panyo uuka aiya Belento nompala'imo kami ka' nompojohokmo mae kami da opokalamo. Belento madi'mo daagi' mamba montumbuhi hingga-hinggat tiba suludadu mami.

¹¹ Pinojohokmo nu Belento na kami mopalaimo mompala'i sampobali' mami ka' ingagoanmo nu aha na halata' mami.

¹² Pinojohokmo nu Belento na kami da okolotmo susumo domba ka' gina'a-ga'atmo nu Belento na kami namba hi aha to bansa-bansa.

¹³ Pinobalukmo nu Belento na mian anu palesayamo, olinyo ola dengke-dengke ka' madi' ahi' nohumpak ka untungan maumo pa' apaa.

¹⁴ Pinotimbalimo nu Belento na kami sola' nu kokojoi nu mian anu mompaha ohani tiba kami aha sola'mo mongalu ka' mongkokojoi kami.

¹⁵ Pinotimbalimo nu Belento na kami anu saja' osindin nu bansa-bansa; aha sola'mo maha lilokan na ubak ka' mompopo ambangmo mae kami.

¹⁶ Sansina-sinaa na aku o'alu, montanggung ambang ka' madi'mo opalesaya,

¹⁷ kalana nohongomo anu sola' mongkokojoi mae ka' anu sola' mongalu mae, lengkat inganga' nu sampobaliku ka' anu mongka'ideki mae.

¹⁸ Iwi-iwi' aijo' nongkonamo mae kami, maumo ahi' kami madi' mongkolilimi Belento kabai molanggai palajajian nu Belento tiba kami.

¹⁹ Kinyonyoa mami madi' monsangka Belento; palentah nu Belento madi' okolilimi mami.

²⁰ Panyo pinala'ianmo nu Belento na kami i uno nu pikat; kami madi'mo noko ala gawe hi binatang anu mahangas.

²¹ De maluanyo kami madi'mo monsombah Tumpu, lantas balado'amo hi pilogot sangga'at,

²² Tantu nusumbu' ahi' nu Tumpu kalana Nu kiop ahi' na lahasia nu kinyonyoa mami.

²³ Kalana Belento kami saja'mo opopobuhuk mae nu kapatean, ka' opojadimo susumo domba anu okolotmo.

²⁴ Pobulamo mae, o Tumpu! Kadaka' Belento ihoyotmo? Tinjomo mae! Boli monsangka kami sampemo toka sidu-sidutu'.

²⁵ Kadaka' Belento natisulukmo, ka' nongkolilimimo sansala ka' mule kasusa'an mami?

²⁶ kami nohintutumo nanabu' itano' natibandangmo i abu' kalana kinalamo.

²⁷ Tinjomo mae ka' tokamo mae montulungi kami, posalamatakon mae na kami nu kalibosan nu Belento.