MAZMUR 4 - KITAB NU TUMPU ALLA LELE MA'IMAI'

Do'a de malomo

¹ Anu mongkapalai panyanyi. O kuti'akon kasapi. Mazmur i Daud.

² O Tumpu, Belentomo na anu montinjohi mae aku; taami mae de aku momoitamo tulung. De aku susa'mo, Belentomo na montulungi aku; uuka aiya kalibosiakon mae na aku ka' potombihingakon mae na do'angku.

³ O to mia-mian, daagi' sangkuka na kopinnyo na belemiu mongambangi Tumpu-ngku? Toka hipian na kopinnyo na belemiu mongka'ima'i anu madi' mingkaliangan ka' pagalamo molio anu madi' totu'u?

⁴ Da osumbu', Tumpu nompile'imo anu nukahanda'i nu bele-Nyo samian na anu Nu kalibosi. Tumpu mompotombihing de aku momoita tulung hi Ia.

⁵ Langkakatanmo ahi' ka' pabuhukmo ka' bolimo ahi' mombau dosa'. Soba dudukuhakon hoko-hokot, de komamale'mo i tampat kahoyotan.

⁶ Osombahkon na koloban anu ahi' sahondo-hondonyo ka' opalesaya na Tumpu.

⁷ Manjo' na mian nompokilawamo, “Ihe na saidi' mae mombalakati kita?” O'amalakon da Belento monginau' mae kami, O Tumpu.

⁸ Belento lebemo nompolame' mae kinyonyoangku nolingkuduimo mian anu nohumpakmo isi nu ale' nu aha.

⁹ Sahingga aku i nale'mo ka' i hoyotmo madi'mo ko anu nompoposia, kalana samata-mata Belento, Tumpu, sahingga kantumuu'anku madi'mo ko anu nompoposia!