MAZMUR 39 - KITAB NU TUMPU ALLA LELE MA'IMAI'

Pangakuan nu mian anu nongoa'imo kasansala'an

¹ Anu mongkapalai panyanyi. Mazmur i Daud. Anu i Yedutun.

² Aku binapikinmo, “Aku monjagaimo butongku da madi'mo baladosa' kalana nu saduakon nu jila'ku. Aku madi'mo mongka'oho' motatae de mian anu ma'idek na kinyonyoanyo daagi' aitu mae ohani.”

³ Aku momohokotmo madi'mo sola' motatae sahingga mosi polugi'mo posi butongku. Ka' kasansala'anku ku oa'i ko boa-boatnyomo;

⁴ aku talalomo ahi' binata-bata hondo. Lebe sola' otutugi, lebe mule' ahi' susa' na kinyonyoangku; ahennyo aku notataemo,

⁵ “O Tumpu poto'imo mae pa' hipianmo na ukunku tokamo mae da kusumbu'mo taalu' talalo ahi' kodo' na umunku.”

⁶ Talalo ahi' sasaingoni' na tinantukan nu Belento na umunku! De hi Belento kopinnyo nu kantumuu'anku madi' ko alati'nyo. Memang, manusia ola susumo opuhakon nu sawo nu manusia,

⁷ kantumuu'annyo ola saintomboliu susumo lolung. Iwi-iwi' na anu nu kalaja madi' mingkaliangan; ia montambun halata', panyo madi' nu sumbu' pa' ihe na mompalagunakon.

⁸ Uuka aiya apaa na ku tanda'i, o Tumpu? Olamo ahi' Belento na ku taha'imani.

⁹ Pimpaliakon mae na aku idosa'ku iwi-iwi', boli opojohok na aku sola'mo nu kokojoi nu mian anu ponga'.

¹⁰ Aku nomohokotmo ka' madi'mo nombuka nganga'ku kalana Belento ahi' na nondoke mae aku.

¹¹ Alinakonmo mae na hukuman anu binee'mo mae nu Belento aiya hi belengku, kalana aku me ise-ise sinilakamo kalana dinokemo mae nu Belento.

¹² Manusia kalana nu saduakon nu kasala'annyo; nu hukumo nu Belento ka' nu dokemo nu Belento susumo atak nu hansunimo nu Belento apaa na anu mingguna hi ia. Memang, manusia ola susumo opuhakon nu sawo nu manusia.

¹³ Potombihingakon mae na do'angku o Tumpu, palahatikan mae de timbali na anu ku kakase aiya; boli ola momohokot de maluanyo aku humangmo. Susumo iwi-iwi' na mompolee'ku ola sasaingoni' na aku manumpang hi Belento.

¹⁴ Boli mae monggangu aku, da aku sangkiding pe'e tenda na bapikin, ka ma'isa pe'e aku mamba ka' madi'mo daagi' ko anu aiya.