MAZMUR 38 - KITAB NU TUMPU ALLA LELE MA'IMAI'Do'a i uno nu kasusa'an 1 Mazmur i Daud tempo'nyo ia nonsombahkon koloban salaku peringatan. 2 Tumpu boli mae mohukum aku kalana Belento notambuha'mo, boli monsakisa mae aku kalana Belento pinusamo. 3 Pana' nu Belento nolampasmo nombelai mae butongku, lima nu Belento ku oa'i naboatmo hondo na nontanomakon mae aku. 4 Tahahumo ahi' na sakitku kalana tambuha' nu Belento; madi'mo daagi' ko anu mahoson i uno nu butongku kalana dosa'ku. 5 Aku nolomosmo i uno nu iaba' kasala'anku, dosa'ku talalomo ahi' nompiboati mae aku. 6 Songko-songko na belangku ninana'mo ka' nabusikmo, kalana aku nimbalu-balu'mo mian anu ponga'. 7 Aku dinumukumo ka' tinadungkungmo sansina-sinaa aku mangkuyumo ka' sinusa'mo na kinyonyoa. 8 Sakit nu sihabi mompapumo mae butongku, madi'mo daagi' ko anu mahoson i uno nu butongku. 9 Aku nohintutumo ka' madi' daagi' kokahosonan aku nolohehengmo kalana kinyonyoangku madi'mo sinanang. 10 O Tumpu nu sumbu' iwi-iwi' apaa na anu ku indi, pengeluhanku madi' tompohowini hi Beleyum. 11 Sulengku nangada'mo kahosonanku imadi'anmo matangku montoa me opiha-pihau'. 12 To sanga-sangalungku madi'mo mae ko anu mongohanii kalana panyakitku, pakalaus to julu-julungku mae nompolilitmo mae aku. 13 Mian anu kokahanda'mo mompatei mae aku, nontanda'imonu so'o bau pohakopnyo aku; aku kakokahanda'mo monsilakai mae aku, notomuhukmo mae kahanda'mo mompatei mae aku. 14 Panyo aku sumomo ahi' mian anu mabongon mamadi' mohongo sumomo ahi' mian anu momo' madi' motatae. 15 Memang ahi' totu'u, aku sumomo mian anu madi' mohongo, sahingga kalana aijo' aku madi' monggagakon. 16 Panyo aku na montaha'imani ahi' Belento o Tumpu ka' Belento, o Tumpungku nontaamimo mae aku. 17 Boli opojohok na sampobali'ku sanang na montoa mae kasusa'anku, boli opojohok na aha motatae buulonmo de maluanyo aku bata-batamo. 18 Me ise-ise' aku nanabu'mo, memo ahi' saja' aku mongoa'i sakit. 19 Ku akuimo na dosa'ku iwi-iwi'; kinyonyoangku bata-bata na mompotutugakon kasala'anku. 20 To mia-mian anu mongewa mae aku da'isan ka' to hoso-hoson, aha mongka'ideki mae jalan nu kantumuu'anku. 21 Mian anu mombalosi ka'ima'an nu palabuatan ma'idek mongewamo mae aku, kalana aku na mombau ahi' palabuatan anu ma'ima'. 22 O Tumpu boli opala'i na aku, boli matikojo'on aiya hi belengku o Tumpu-ngku. 23 Tokamo mae lia-lia' montulungi aku, o Tumpu anu momposalamat mae aku. |
LAI 2002
Indonesian Bible Society