MAZMUR 34 - KITAB NU TUMPU ALLA LELE MA'IMAI'

Pompuji kanonongan nu Tumpu

¹ Mazmur i Daud, tempo'nyo ia nimpula-pulamo madi'mo noko ala binapikin i ahop i Abimelekh, sahingga ia ila'mo lantas ia nambamo.

² Aku montalimakasemo hi Tumpu sansina-sinaa ka' madi' belenti na mompuji' Ia.

³ Aku binilahimo kalana palabuatan nu Tumpu; o'amalakon da mian anu sinansalamo mohongo mae ka' lame'mo.

⁴ O puji' na Tumpu tiba aku na mompuji' imbo' hingga-hinggat moholomati sanggo-Nyo.

⁵ Aku binalado'amo hi Tumpu, ka' tinaaman-Nyomo mae ka' madi'mo aku nabuhuk i iwi-iwi na anu okabuhuk.

⁶ Mian anu sinansalamo nontaha'imanimo ia ka' ilame'mo aha madi'mo daagi' mohumpak ambang.

⁷ Mian anu sinoe'mo na kantumuu'annyo nomoitamo tulung ka' tinaamanmo mae nu Tumpu nompobebasmo ia da madi'mo nongoa'i iwi-iwi na kasusa'annyo.

⁸ Malaekat nu Tumpu monjagai mian anu tulu-tulutan, ka' nompobebasmo aha da madi' nu kona nu bahaya.

⁹ Posi oa'imo pa' mosia na ko nonongnyo nu Tumpu, mohumpak kantumuu'an ma'ima' na mian anu mihohung hi Ia.

¹⁰ Oholomati na Tumpu, o belemiu mian anu palesayamo hi Ia, kalana mian anu tulu-tulutan na madi' ahi' kakulangan.

¹¹ Sadang singa suele mo ohop de madi'mo ko anu okaan panyo mian anu monsombah Tumpu na madi' ahi' kakulangan.

¹² Potombihing mae o to ana-anak iwi-iwi' da ku ajan na belemiu moholomati Tumpu.

¹³ Pa' belemiu mongka'ima'i da mantan na umun ka' molasai anu ma'ima'?

¹⁴ Boli montaeakon potatae anu toto ide-idek ka' boli mongka'ima'i ola saja' mongakali mian.

¹⁵ patikojo'on ipalabuatan anu ma'idek, anu ma'ima' ahi' na saja' obau o'usahakan ahi' totu-totu'u na paladamean.

¹⁶ Tumpu mompalahatikan mian anu bala iman hondo, Nu potombihing de aha moloboo' momoita tulung.

¹⁷ Panyo mian anu mombau palabuatan anu ma'idek na Nu ka'ideki ahi'; de aha silakamo, aha sampa okolilimi.

¹⁸ De maluanyo mian anu bala iman hondo, mongkakase momoita tulung, nu hongo nu Tumpu, ka' momposalamatakon aha da madi' nu kona nu iwi-iwi' na kasusa'an.

¹⁹ Tumpu ohani hi mian anu kinesewamo; ka' momposalamat mian anu madi'mo ko sumangatnyo.

²⁰ Manjoo' hondo na kasansala'an nu oa'i nu mian anu manonong, panyo nu pobebasmo nu Tumpu na ia ihan aijo' iwi-iwi'.

²¹ Butongnyo tataap nu jagai nu Tumpu, ka' bukunyo mau pe'e sa'angu' madi' ko anu opato'akon.

²² Mian anu ma'idek na palabuatannyo silaka kalana palabuatannyo ma'i-ma'idek mian anu mongka'ideki mian anu balaiman hondo mohumpak hukuman.

²³ Tumpu momposalamat to posa-posaihon-Nyo; anu mihohung hi Ia madi' mohumpak hukuman.