MAZMUR 33 - KITAB NU TUMPU ALLA LELE MA'IMAI'

Lagu anu bau pompuji'

¹ O to mia-mian anu bala iman hondo, pontaligalaimo ka' lame'mo kalana nongoa'imo apaa na anu binaumo nu Tumpu; tionyo ahi' na mian anu madi' tageo' na kinyonyoanyo mompuji-puji' Tumpu.

² Pontalimakaseh hi Tumpu okutiakon kasapi' manyanyimo bau pompuji' Ia ka' opakeakon musik.

³ Nyanyiakon na nyanyian anu salaje' ingajan bau pompuji' Tumpu, kuti' ima-ima' na kasapi' ka' pontaligalai lame-lame'!

⁴ Iwi-iwi' na potatae nu Tumpu timbali opalesaya; Ia manonong hi iwi-iwi' na anu binau-Nyomo.

⁵ Ia mongka'ima'i palabuatan anu madi' tageo' tiba ka adinan; songko-songko na dunia nobuke'mo nu kalibosan-Nyo.

⁶ Tumpu nompalentah, sahingga langit jinadimo; batu nu sinaa, bitu'on tiba mandala' pinojadimo nu potatae-Nyo.

⁷ Iwi-iwi' na ambai pinosa'angu'-Nyomo isa'angu' na tampat ndalangon anu talalo ahi' ewa tinahan-Nyomo i uno nu bandungan.

⁸ Tionyo ahi' songko-songko na dunia mongkabuhuk Tumpu ka' mian anu jojoong i dunia moholomati ahi' Ia.

⁹ Kalana Ia notatae, lantas iwi-iwi' pinotimbalimo Ia nompalentahmo, sahingga iwi-iwi' daagi'mo.

¹⁰ Tumpu madi'mo nompojadi tanga'an nu to bansa-bansa, Ia madi'mo nompobee' niat nu aha.

¹¹ Panyo tanga'an nu Tumpu na tataap ahi' sabole-bole jadi tanga'an-Nyo otaha'imani sampe toka sidu-sidutu'.

¹² Mohumpak kantumuu'an ma'ima' na bansa anu mongakui Tumpu salaku Tumpunyo, mohumpak kantumuu'an ma'ima' na mian anu pinile'an-Nyomo ka' Iamo na tumpu-Nyo!

¹³ Kiita' mae i suluga' Tumpu montoa mokaiyong, ka' Nu toa iwi-iwi' na manusia.

¹⁴ Kiita' mae i kasuhangan-Nyo Tumpu mompalahatikan iwi-iwi' na anu jojoong i dunia.

¹⁵ Iamo na nombontuk kinyonyoa nu manusia, ka' monsumbu' iwi-iwi' palabuatan nu aha.

¹⁶ Tomundo' madi' sanangkalana suludadunyo da'isan suludadu madi' salamat kalana aha mahoson.

¹⁷ Ajahana madi' timbali otaha'imani mompo untung de mahampate kahosonannyo anu daka' aijo' madi' moko ala momposalamat.

¹⁸ Tumpu monjagai aha to mia-mian anu tulu-tulutan hondo anu talalo ahi' montaha'imani kalibosan-Nyo.

¹⁹ Ia na momposalamat aha da madi' silaka ka' mompotumuu' aha de tokamo mae na kasusa'an i anu okaan.

²⁰ Jadi kita montaha'imani ahi' Tumpu Ia ahi' na montulungi mae ka' montinjohi mae kita.

²¹ Kita balame-lame' kalana Ia ka' palesaya hi sanggo-Nyo anu susi' aijo'.

²² O' amalakon da kami tataap ahi kalibosi nu Belento, o Tumpu kalana kami na montaha'imani ahi' Belento.