MAZMUR 32 - KITAB NU TUMPU ALLA LELE MA'IMAI'

Pangakuan ka' o ampunimo

¹ Mazmur i Daud. Nyanyian pangajalan. Mohumpak ka'ima'an na kantumuu'an nu mian anu dosa'nyo o ampunimo, ka' kasala'annyo madi'mo olekeng kasala'an.

² Mohumpak ka'ima'an na kantumuu'an nu mian anu palabuatannyo ma'i-ma'idek madi'mo nu palahatikan nu Tumpu ka' suele anu madi' ka'oho' mongakali.

³ De aku ma'isa mongakui dosa'ku, aku tumuu' susa' kalana me saja' motusa' sansina-sinaa.

⁴ Sinaa tiba pihi Belento mompeedakon mae aku, o Tumpu hosonku ku oa'i ningkotmo sumomo ahi' anu sinosopmo nu singit anu mapengges hondo

⁵ Lantas ingakuankumo na dosa'ku hi Belento, kasala'anku madi'mo ko anu pinohowiningku. Tinantukankumo na aku mongakuimo hi Belento, ka' Belento nongampunimo iwi-iwi' na dosa'ku.

⁶ Kalana aijo' batu-batu mian anu bala'iman tionyo ahi' balado'a de nu tokaimo mae nu kasusa'an sahingga de maluanyo iaba' nu kasusa'an tokamo mae ia na madi' ahi' nu anjuhakon.

⁷ Belentomo na tampat paninsulukanku, Pinobebasmo nu Belento na aku da madi' tinokan nu kasusa'an. Sahingga aku nontaligalaimo kalana ilame'mo kalana Belento nomposalamatmo mae aku.

⁸ Tumpu notatae, “Ku potiju'je na jalan anu tionyo ahi' nu jalani beleyum Ku taka'je ka' Ku pokinde'ije.

⁹ Boli mule' ahi' susumo ajahan anu madi' ko pikilannyo, anu tionyoje ahi' opotiju' nu tambangnyo tiba kahohon da montuluti.”

¹⁰ Mian anu baladosa' saja' nu tokai mae nu kasansala'an; panyo mian anu saja' montaha'imani Tumpu tataap nu jagai nu kalibosan-Nyo.

¹¹ O to mia-mian anu bala iman, bila-bilahimo ka' balame-lame'mo, kalana nongoa'imo apaa na anu binaumo nu Tumpu. Pontaligalaimo ka' bilahimo, o iwi-iwi' na mian anu madi' tageo' na kinyonyoanyo!