MAZMUR 31 - KITAB NU TUMPU ALLA LELE MA'IMAI'

Montaha'imani Tumpu

¹ Anu mongkapalai panyanyi. Mazmur i Daud.

² Hi Belento na bau pihohunganku o Tumpu, Boli opojohok na aku mohumpak ambang. Posalamatakon mae na aku nu ka adinan nu Belento

³ potombihingakon mae na aku ka' sampamo mae pobebas na aku lia-lia'. Potimbalimo mae susumo bungkutnyo nu batu hi belengku da bau pihohunganku susumo benteng anu mahoson tampat kasalamatanku.

⁴ Memang Belento sumomo ahi' bungkutnyo nu batu ka' salaku benteng anu mahoson pihohunganku! Taka' mae na aku susumo anu jinanji'mo nu Belento.

⁵ Boli mae nu kona nu so'o na aku anu tina'anmo nu aha pohakop aku kalana hi Belentomo na tampat bau pihohunganku.

⁶ Ilimamo nu Belento na pongasanakonanku butongku aiya: Belento mompobebasmo aku, o Tumpu, Tumpu anu manonong.

⁷ Mian anu monsombah pilogot nu ka'ideki nu Belento; panyo aku na palesaya ahi' hi Tumpu.

⁸ Aku lame'mo ka' mule' bilahimo kalana Belento tataap mongkalibosi mae aku. Belento nontoamo mae kasansala'anku, ka' nompalahatikanmo mae kasusa'anku.

⁹ Belento madi' mompojohok mae aku nu hakop ka' nu boa nu sampobali'ku, panyo mompobee' ahi' mae aku lumajang bebas.

¹⁰ Kalibosiakon mae na aku, o Tumpu, kalana aku i unomo nu kasusa'an; matangku napoe'mo kalana lewa'mo humang kantumuu'anku nateekmo.

¹¹ Kantumuu'anku ningkotmo nu kasansala'an taun-taun anu aku tinumuu'mo pinala'ianmo tempo'nyo aitu lasaja' sinusa' ka' sinansala. Hosonku naga'amo kalana palabuatanku ma'i-ma'idek pakalaus mule' iwi-iwi na bukungku nahu'mo.

¹² Aku ihakopmo ka' binoamo nu aha iwi-iwi' anu monsampobali' mae aku, pakalaus mule' ahi' hi aha anu mompaha ohani na laigan tiba aku. Iwi-iwi' na anu mompahasumbu' tiba aku tinolokengkengmo na montoa aku, aha mopalaimo de singkabot tiba aku ijalan.

¹³ Aku kinolilimanmo susumo mian anu sinilakamo, ka' mule' tinimbalimo susumo balang anu ingalinmo.

¹⁴ Iyaya mae daagi'mo ko anu okabuhuk; ihongongkumo na anu monsampobali' mae aku lewa' basisik. Aha binasangaja'mo mongewamo mae aku, ka' binatanga'mo da mompateimo mae aku.

¹⁵ Panyo aku montaha'imani Belento o Tumpu, kalana Belentomo na Tumpu-ngku.

¹⁶ Belento saja' mompotuu' aku; posalamatakon mae na aku da madi' nu patei nu sampobali'ku, ka' mule' to mia-mian anu moloi' mae aku.

¹⁷ De timbali Belento sanang mae ahi' hi posaihon nu Belento aiya; posalamatakon mae na aku nu kalibosan nu Belento.

¹⁸ Boli opojohok mae na aku mohumpak ambang, o Tumpu, kalana aku nongkakasemo hi Belento. Pojohok na mian anu ma'idek na palabuatannyo opopo ambang, ka' hoko-hokot aha mintatau'mo idunia nu mian anu sinilakamo.

¹⁹ Paha onsongi na nganga' nu mian anu toto bale-baleko' kalana katabuulan nu aha sola'mo mongalu mian anu madi' tageo' na kinyonyoanyo.

²⁰ Talalo ahi' manjoo' na kanonongan nu Belento anu pinosadiamo nu Belento bau bagi nu mian anu palesaya! Batu-batuu mian nontoamo kanonongan anu binaumo nu Belento, kona hi aha anu mihohung hi Belento.

²¹ Belento nomposulukmo aha i uno nu ponjaga'an nu Belento, da madi' nu poko ala nu tanga'an ma'idek nu aha mian anu ma'idek na kinyonyoanyo; jinaganmo nu Belento na aha da aha mihohung hi Belento da madi' nu kona nu tuduhan nu anu mongewa aha.

²² O puji' na Tumpu' Talalo ahi' okabangangi na kalibosan-Nyo hi belengku, tempo'nyo aku tinikumo ka' tinumbuhanmo.

²³ Salatan aku biningongmo aku nonsangkamo Tumpu nongalinmo aku da majo'onmo hi ahop-Nyo. Panyo ihongo-Nyomo ahi' mae na anu kinakase'kumo tempo'nyo aku nomoitamo tulung hi Ia.

²⁴ Ka'ima'i na Tumpu o iwi-iwi' na mian anu palesayamo hi Ia, Tumpu na monjagai mian anu tulu-tulutan hi Ia. Panyo mian anu takabun na Nu hukum ahi' madi' ka' madi'.

²⁵ Pohoson ka' potataap na kinyonyoa nu beleyum, belemiu iwi-iwi' anu montaha'imani Tumpu!